Túrkistanda «Baltakól» kitabynyń tusaýkeser rásimi ótti. Is-shara barysynda pikir bildirgen zııaly qaýym ókilderiniń aıtýynsha, bul keshegi keńsharlyq qurylymnyń paıdaly tustary men jetistikteri, eńbekqor azamattary men bir sovhoz turǵyndarynyń ómiri jaıly jazylǵan óńirdegi alǵashqy kitap.
Elge iskerligimen tanylǵan, Ońtústik Qazaqstan oblystyq máslıhatynyń depýtaty Serikbaı Ibadýllaevtyń bul eńbeginde naqty derekterge súıene, ózi týyp-ósken Otyrar aýdanyna qarasty Baltakól sovhozynyń 31 jyldyq tynys-tirshiligi, onda eńbek etken azamattar jaıynda jazypty. Avtor eńbek jolyn osy Baltakól keńsharynda qarapaıym qurylysshydan bastap aǵa prorab, partkom hatshysy, sovhoz dırektory laýazymyna deıin kóterilgen. Iаǵnı «Baltakól» kitaby avtordyń ótkendi eske alyp, oı eleginen ótkize jazǵan, týǵan jer – ósken ortaǵa degen saǵynyshynan, qurmetinen týǵan shynaıy shyǵarma.
– Elbasy N.Nazarbaev «Bolashaqqa baǵdar: rýhanı jańǵyrý» baǵdarlamalyq maqalasynda árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri baryn, osynyń bárin jas urpaq bilip ósýge tıis ekendigin aıtty. «Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady» degen Memleket basshysy «Týǵan jer» baǵdarlamasyn qolǵa alýdy usyndy. Igi bastama búginde elimizde júzege asyrylýda. Iá, halqymyzda «О́tkenińdi bilmeseń – bolashaǵyńdy boljaı almaısyń», degen danalyq sóz bar. Sol aıtpaqshy, ózimizdiń altyn besigimiz atanǵan qasıetti «Baltakól» aýyly jaıly sóz qozǵaı qalsam, keýdemdi maqtanysh sezimi kerneıtini ras», – deıdi Serikbaı Ibadýllauly.
Bes taraýdan turatyn, irgeli bir aýyldyń ensıklopedııasy derlik kitap – jeti jyl boıǵy tynymsyz izdenistiń nátıjesi. «Baltakól» qarakól-qoı sovhozynyń qurylý, qalyptasý, damý joldary jónindegi derekter, estelikter, 1965-1996 jyldary eńbek etken azamattardyń ómirderegi jınaqtalǵan. Sondaı-aq munda aqynjandy azamattyń óleńder toptamasy engen. «О́zderi týyp-ósken aýyly nemese aımaq týraly jan-jaqty habardar bolǵan jastardyń el tarıhyn da tereń tanıtyny anyq. Bul kitapty jazýdaǵy maqsatym keńshar taraǵaly beri de kóp jyldar ótti. О́kinishke qaraı, toqsanynshy jyldary dúnıege kelgen urpaq óz aýylynyń ótkeninen habarsyz. Sondyqtan da jas urpaqqa qaıratty da eńbekqor, óńir ekonomıkasynyń qýatty bolýy úshin ter tókken atalary men baýyrlary jaıly estelikti jetkizgim keldi», deıdi avtor.
Sońǵy jyldary derekti pýblısıstıkalyq shyǵarmalar jazyp, oqyrmanǵa «Syr boıy – qutty mekenim», «Aǵartý» atty týyndylaryn usynǵan Serikbaı Ibadýllauly jyldar boıy izdenip, óz qarjysyna basyp shyǵarǵan «Baltakól» kitabyn kitaphanalarǵa, aýyl azamattaryna taratpaq.
Ǵalymjan ELShIBAI, «Egemen Qazaqstan»