Phenchhandaǵy qysqy Olımpıada oıyndarynda qola júldege ıe bolǵan Iýlııa Galyshevany búgin oblys ákiminiń orynbasary Ásem Núsipova, qala ákimi Qýat Tumabaev, oblystyq dene shynyqtyrý jáne sport basqarmasynyń basshysy Asqar Mojanov bastaǵan jerlesteri, sport jankúıerleri О́skemendegi áýejaıdan qushaq-qushaq gúlmen qushaq jaıa qarsy aldy.
«Sizdi jáne jattyqtyrýshylardy aımaq basshysynyń atynan dúbirli dodada qola medal ıelenýlerińizben shyn júrekten quttyqtaımyn. Árıne, bul – tarıhı sát. Aldaǵy ýaqytta da elimizdiń abyroıyn asqaqtata berińiz», - dedi óziniń quttyqtaý sózinde oblys ákiminiń orynbasary Á.Núsipova.
«О́zimniń júldeger atanǵanymdy, medaldyń ıesi shyn máninde ózim ekenimdi Almatyǵa, týǵan jerge taban tiregen kezde shynaıy sezindim. Shynyn aıtqanda, Ońtústik Koreıada mundaı sezimdi bastan keshken joqpyn», - dedi óskemendik frıstaılshy jýrnalısterge bergen suhbatynda.
Qola júldeger osy Olımpıada aldynda Kanada tarapynan ózine usynys túskenin, 2015 jyly Reseı quramasy da ózderine shaqyrǵanyn aıtyp, biraq eshýaqytta elden ketpeıtinin, Qazaqstannyń kók baıraǵyn ǵana kóterý jolynda eńbek etetinin jetkizdi. Sonymen qatar Ońtústik Koreıadaǵy kórsetken ónerine óziniń kóńili tolatynyn, tóreshilerge eshqandaı ókpesi joq ekendigin, ázirge demalys almaıtynyn, bir jarym aıdaı jarystarǵa qatysatynyn, kelesi qysqy Olımpıadaǵa barýdan da bas tartpaıtynyn tilge tıek etti.
Azamat QASYM,
«Egemen Qazaqstan»
О́SKEMEN