Belgili bard ánshi Tabyldy Dosymovtyń uly Aıash Abyldyń «Tuńǵysh ret» óner keshi «Qazaqkonsert» memlekettik konserttik uıymynyń kameralyq zalynda ótti.
El esinde qazaqtyń tuńǵysh bard aqyny retinde qurmetpen atalatyn Tabyldy Dosymovtyń ánderi men gıtaramen salǵan qońyr úni qandaı áserli de mándi bolsa, onyń shyǵarmashylyǵyna qanyq halqy úshin de bul ónerdiń orny qashanda qymbat bolyp qala bermek. Qazirgi tańda ánshiniń mýzykalyq murasyn jınaqtap, artynda qalǵan rýhanı mol qazynasyn halqyna qaltqysyz jetkizýde tyń janrdyń janashyrlary aýqymdy jumystar atqarýda. Zamana tynysyn gıtaranyń únine qosyp jetkizetin daryn ıesi buǵan deıin ultymyzda bolmaǵan desedi. Aqyn Muqaǵalı Maqataevtyń «Unatamyn men seni» óleńiniń mátinine jazylǵan Tabyldynyń áni jyrmen jymdasa qabysyp, júrek túbine uıalaǵan edi.
Ákege mahabbat pen saǵynysh sazy Abyldyń ár sózinen, ónerge órlene qanat qaǵysynan sezilip turdy. Júreginiń tusyna jaqyn ustaǵan saıyn gıtara úni shaǵaladaı sharyqtap, áke men balanyń, qos armannyń daýysy kókjıekte talmaı qalyqtap, kóńilge shýaq sebeledi.
Keshti óner ıesi Abyl Tabyldyulynyń ózi júrgizip otyrdy. «Men qazaqpyn», «Bıiktik», «Unatamyn men seni», «Kúnekeı qyz», «Biraq, biraq...», «Astana», «Keshirińdershi, adamdar», «Sáıgúlik», «Tabyldyń áni», «Qazaq edim degenshe», «Astananyń arýy»... taǵy basqa ánderdiń áýenine tebirengen kópshilik ár ánge qoshemet bildirip, uzaq qol soǵyp otyrdy.
Qazaq ulttyq án óneriniń órkendeýine qyzmet etip júrgen janashyrlar Qorabaı Esenov, Elena Ábdihalyqova, Álimbek Keldibaı, Erjan Saǵynbaev, Seıil Aıaǵannyń óneri de jurtshylyqty bir serpiltip tastady. Kesh sońynda Tabyldy Dosymov atyndaǵy qordyń dırektory, ulttyq ónerdiń qoldaýshysy Bıjan Qalmaǵambetov pen Tabyldy Dosymovtyń jary, Abyldyń anasy Qarlyǵash Basarqyzy sóz sóıledi. «Tuńǵysh ret» óner keshi Aıash Tabyldyulynyń elorda toıyna, Astananyń 20 jyldyq merekesine tartýy bolyp tabylady.
Qarshyǵa KÚLEN