Eńbek jáne halyqty áleýmettik qorǵaý mınıstri Mádına Ábilqasymova oblysta jumys saparymen bolyp, birqatar kezdesýler ótkizdi.
Vedomstvo basshysy jergilikti jerlerde «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda atqarylyp jatqan is-sharalarmen, jańa sıpattaǵy ataýly áleýmettik kómekti júzege asyrýdyń tıimdi tetikterimen tanysty. Aýdan ákimderiniń, jumyspen qamtý jáne áleýmettik baǵdarlamalar bólimi jetekshileriniń qatysýymen ótken alqaly basqosýda ózin-ózi jumyspen qamtyǵandardy resimdeý boıynsha jol kartasyn oryndaý barysy keńinen áńgimelendi.
Mınıstr kirispe sózinde Úkimettiń keńeıtilgen otyrysynda Elbasy N. Nazarbaev ózin-ózi jumyspen qamtyp júrgen azamattardy zańdastyryp, resmı túrde tirkeýge tapsyrma bergenin aıta kelip, bul baǵytta qyrýar sharýalar atqarylyp jatqanyn jetkizdi. Byltyr mindetti áleýmettik medısınalyq saqtandyrý júıesin engizýge daıyndyq kezinde turǵyndardyń mártebesi derekter bazasynda tekserilgen bolatyn. Nátıjesinde 13,2 mıllıon adamnyń áleýmettik mártebesi anyqtaldy. Úı-úıdi aralaý kezinde ózin-ózi jumyspen qamtyǵan 3 mıllıon adam resimdelse, 130 myńdaıy – Soltústik Qazaqstan oblysynyń turǵyndary. Salalyq vedomstvo jetekshisi jınalǵandardyń nazaryn máseleniń eń ózekti tustaryna aýdaryp, ózin-ózi jumyspen qamtyǵandardy eki sanatqa bólý kerektigin atap kórsetti. Birinshi top – beıresmı jumyspen qamtylǵandar, ıaǵnı eshqandaı eńbek kelisimshartynsyz tirkelmegen jeke kásipkerler men jaldamaly jumysshylar. Qyzyljar óńirinde olardyń sany 39 myńnan asyp jyǵylady. Bul sanataǵylardy resimdeý ortalyq deńgeıde júrgizilse, jeńildetilgen salyq pen tirkeý, shaǵyn nesıe berý tetikterin keńeıtý qamtamasyz etiledi. Al ózin-ózi jumyspen qamtyǵan ekinshi top úshin jergilikti deńgeıde jumysqa ornalasýǵa járdemdesýge naqty sharalar qabyldaý qajet. Bulardyń sany oblysta 36 myń adamǵa jedeǵabyl. Osy rette bıyl 27,5 myń ózin-ózi jumyspen qamtýshy jáne jumyssyz júrgenderdi nátıjeli jumysqa tartýdy qadap tapsyrdy.
Oblys ákiminiń orynbasary Ashat Saqypkereev adamdardy jumyspen qamtamasyz etýdiń memlekettik saıasatynyń oryndalýy jaıly baıandady. Byltyr 30714 adam jumysqa ornalasqan. Jańadan qurylǵan jumys oryndaryna 13492 adam tartylǵan. Eńbek naryǵynda oń ahýal qalyptastyrý, kóshi-qon úderisin retteý maqsatymen jol kartasy túzilip, 13,3 myń jumyssyz ben 14,2 myń ózin-ózi qamtýshyny eńbekke tartý qarastyrylǵan.
Mınıstr halyq tyǵyz ornalasqan, jumys kúshi kóp aımaqtardan kóship kelgen otbasylardy ornalastyrý, áleýmettik kómekter berý sharalaryn keshendi túrde júrgizýdi mindettedi. Kúngeı jaqtardan qonys aýdarǵandardy jumysqa ornalastyrý jetkiliksiz deńgeıde. 2017 jyly eńbekke qabiletti adamdardyń jartysy ǵana jumyspen qamtylǵan, dedi M.Ábilqasymova. Osyǵan baılanysty jumyspen qamtý jáne eńbek aǵyndaryn retteýdi tıisti dárejede júrgizýdi atap kórsetti.
О́mir Esqalı,
"Egemen Qazaqstan"
Soltústik Qazaqstan oblysy