Keshe Ortalyq saılaý komıssııasynda 2017 jyldyń jumys qorytyndylary jáne ústimizdegi jyldyń jańa baǵyttaryn tanystyrý boıynsha keńeıtilgen otyrys boldy.
Otyrysqa oblystardyń, Astana jáne Almaty qalalarynyń saılaý komıssııalarynyń tóraǵalary men hatshylary, oblystardyń, Astana jáne Almaty qalalary ákimderi apparattarynyń jetekshileri, Parlament Májilisiniń depýtattary, Ádilet, Bilim jáne ǵylym mınıstrlikteriniń, Qazaqstan Respýblıkasynyń Prezıdenti janyndaǵy Memlekettik basqarý akademııasynyń, Qazaqstan halqy Assambleıasynyń ókilderi jáne elektoraldy bilim berý boıynsha jattyqtyrýshylar qatysty.
Ortalyq saılaý komıssııasynyń tóraǵasy Berik Imashev otyrysta sóılegen alǵysózinde 2017 jyly OSK-nyń jumysy saılaý júıesiniń zańnamalyq negizin jaqsartý, halyqaralyq yntymaqtastyqty damytý, saılaý prosesterin sıfrlandyrý jáne elektoraldy bilim berý júıesin uıymdastyrýǵa baǵyttalǵanyn atap ótti. Jyl qorytyndysy boıynsha baıandamany tóraǵanyń orynbasary Konstantın Petrov jasady.
B.Imashev Ortalyq saılaý komıssııasyna kelip túsken jáne múddeli organdarmen kelisý úshin engizilgen, Úkimet usynǵan «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýsııalyq zańyna ózgertýler men tolyqtyrýlar engizý týraly» zań jobasyna nazar aýdardy.
Otyrysta Ádilet vıse-mınıstri N.Pan, Parlament Májilisi depýtattyq fraksııalarynyń jetekshileri: «Nur Otan» partııasynan I.Aronova, «Aq jol» partııasynan A.Perýashev, QKHP hatshysy V.Kosarev, Qazaqstan halqy Assambleıasynan S.Abdrahmanov, Adam quqyǵy boıynsha ulttyq ortalyqtyń jetekshisi S.Ospanov, Eýropalyq quqyq jáne adam quqyqtary boıynsha sarapshylyq ınstıtýtynyń dırektory M.Bashımov sóz sóıledi. Sonymen qatar Qostanaı oblystyq saılaý komıssııasynyń tóraıymy A.Markova jáne Almaty oblystyq saılaý komıssııasynyń tóraǵasy T.Daýtov óz oılarymen bólisti.
OSK tóraǵasy Berik Imashev elimizdiń saılaý júıesi 93 myńnan astam saılaý komıssııasy múshelerin qamtıtynyn jáne Ortalyq saılaý komıssııasy saılaý boıynsha zańnamany ózgertýge múddeli taraptardyń jáne qoǵamnyń qatysýymen pikir alysatyn eń tıimdi talqylaý alańy ekenin atap ótti. Sondaı-aq B.Imashev Ortalyq saılaý komıssııasy jumysynyń aldaǵy ýaqytqa qoıǵan basymdyqtary men naqty baǵyttaryn uıymdastyrýda jańa formalar men ádis-tásilderin qoldaný jaıly, saıası partııalar jáne azamattyq qoǵammen yntymaqtastyq máseleleri jóninde aıtyp ótti.
Jaqsybaı SAMRAT,
Sýretti túsirgen Erlan OMAR,
«Egemen Qazaqstan»