Men táýelsiz Qazaqstanda azamattardyń quqyqtary men bostandyqtaryn qorǵaý isinde 18 jyldan astam qyzmet etip kelemin. Osy jyldar ishinde elimizdegi yntymaq pen kelisimge, tatýlyqqa negizdelgen saıasat árbir qazaqstandyqtyń berekeli tirlik keshýine, kózdegen maqsatyna jetýine sara jol salyp otyr. Sondaı azamattardyń biri – men eńbegimniń jemisin kórip, búginde áriptesterimmen birge polısııa polkovnıgi shenine jetkenimdi maqtan etemin. Osy oraıda ataýly kún qarsańynda týǵan elime rızashylyǵymdy bildiremin.
Men 1980 jylǵy 10 tamyzda Soltústik Qazaqstan oblysynyń Petropavl qalasynda dúnıege keldim. Halyqqa qyzmet kórsetý, quqyqtyq tártipti saqtaý qasıetteri maǵan ákemnen darydy. Ákem Aleksandr Petrovıch Klımov 30 jyldan asa ishki ister organdarynda ýchaskelik polısııa ınspektory qyzmetin atqardy. Polısııa podpolkovnıgi sheninde zeınetke shyqty. Ákemniń isin jalǵastyrý maqsatynda inim ekeýimiz ishki ister organdarynda qyzmet etip júrmiz. Ata-anamnan alǵan tálim-tárbıe ómirlik ustanymym boldy.
1997 jyly mektepti aıaqtaǵannan keıin Qazaqstan IIM-niń Semeı zań kolledjine «Quqyq qorǵaý qyzmeti» mamandyǵy boıynsha oqýǵa túsip, úzdik aıaqtap shyqtym. 1999 jyly oqýdy bitirgennen keıin eńbek jolymdy SQO Ishki ister departamentiniń Krımınaldyq polısııa basqarmasynda jedel ýákil laýazymynan bastadym. Búgingi tańda basqarma bastyǵy laýazymynda qyzmet atqaramyn.
Keı kezderi qylmysty birden ashý múmkin emes. Tapjylmaı eńbek etseń ǵana nátıjege qol jetkizesiń. Qylmysty ashqan kezde boryshtyń ótelgenin seziný jáne ádildik ornaýy saǵan odan ári qyzmet etýge serpilis beredi, isińniń nátıjesi kóńilińnen shyǵyp, rahat seziminde bolasyń.
Iz kesýshiniń mindeti – ýaqytpen sanaspaı berile eńbek etý. Keı kezderi onyń nátıjesi kózge kórinbeıdi, biraq bul eń bastysy emes. Biz adamdarǵa zańnyń ústemdik etýine jáne ádildikke senýlerine kómektesemiz. Bul eńbegimizdiń basty baǵasy! Osyndaı dárejege jetkizgen Qazaq elime, Ishki ister mınıstrligine, Ishki ister departamentine, tálimgerlerime, ujymyma, qyzmet etýge jan-jaqty jaǵdaı jasap jatqan Elbasyna alǵysym sheksiz! Qazaqstannyń ishki ister organdary júıesinde qyzmet etýdi – taǵdyrdyń syıy dep bilemin.
Petr Klımov,
polısııa polkovnıgi, IID Krımınaldyq polısııa basqarmasynyń bastyǵy
Soltústik Qazaqstan oblysy