Búgingi tańda elordada 10 saıabaq, 4 jelekjol jáne 95 gúl baǵy bar, dep habarlaıdy Astana ákimdiginiń resmı saıty.
«Qalada gúl baqtaryn, saıabaqtardy jáne basqa da qoǵamdyq oryndardy abattandyrý jumystary júrgizilýde. Astananyń basqa da turǵyndary sııaqty men de qalamyzdy gúldengen megapolıs retinde kórgim keledi», dep málimdedi elorda ákimi Áset Isekeshev halyq aldyndaǵy eseptik kezdesýi kezinde.
Qazirgi tańda elordada 10 saıabaq, 4 jelekjol men 95 gúl baǵy bar. «Almaty» aýdanynda Aqbulaq ózeniniń jaǵasyndaǵy burynǵy jaıaý júrginshilerge arnalǵan joldary, balalarǵa arnalǵan oıyn alańdary men sporttyq alańdary bar iri qazanshuńqyrdyń ornynda paıda bolǵan gúl baǵynda júrgizilgen jaılastyrý jumystaryn qosa alǵanda 2017 jyly mundaı 6 oryn ashylǵan bolatyn.
Búgingi tańda qalada 714 myń aǵash bar. Taǵy da 2,1 mln kóshet qala aınalasyna «Elordanyń jasyl beldeýi» aıasynda otyrǵyzyldy.
«Biz qoǵamdyq keńistikke zor mán beremiz. Bıyl biz 9 gúl baǵy men jelekjoldardy jaılastyratyn bolamyz. Qalalyqtardyń ótinishteri eskerilip, demalys oryndarynyń kóbisi qalanyń eski bóliginde apatty jáne kóne úıler súrilgen jerlerde paıda bolady. Olardyń barlyǵy sporttyq alańdarmen jabdyqtalmaq», dep atap ótti ákim.
Jazda elordada Botanıkalyq baq ashylady. Onyń aýmaǵy tropıkalyq beldeýdiń klımattyq erekshelikterimen tolyqtaı qamtamasyz etilip, munda shóldi jerlerdegi ósimdikter ósirilmek.
«Ol tanymdylyq jaǵynan qyzyqty, barlyq servıstik ınfraqurylymy bar kórikti orynǵa aınalatyn bolady», dedi Á. Isekeshev.
Búgingi kúnge deıin 24 myńnan astam aǵash pen 12 myńnan astam kóshet otyrǵyzylyp, jasandy sý qoımasy salyndy. Qalada jalpy aýdany 42 myń sharshy metrden asatyn velojoldar, aýdany 23 myń sharshy metrdi quraıtyn júgirý joldary, jalpy aýdany 86 myń sharshy metrden asatyn kespe tastar tóselgen joldar salyndy.
Sondaı-aq, shilde aıynda ózen jaǵasyndaǵy saıabaqtyń birinshi kezeginiń qurylysy aıaqtaldy. Qalamyzda tuńǵysh ret Shıe, Alma, Emen jáne sheten alleıasy paıda bolady.