XII Qysqy parolımpıada oıyndary Naýryz aıynyń 9 men 18 aralyǵynda Ońtústik Koreıanyń Phenchan qalasynda ótetini málim. Álemniń ár qıyrynan kelgen 700-ge tarta sportshy baq synaıtyn tórtjyldyqtyń basty básekesine Qazaqstan parolımpıada quramasy da attandy. Almaty mańyndaǵy «Alataý» shańǵy-bıatlon kesheninde sportshylardy saltanatty túrde shyǵaryp salý rásimi ótti.
Parolımpıada oıyndarynda elimizdiń atynan alty sportshy óner kórsetedi. Olardyń sapynda shańǵy jarysy men bıotlon boıynsha baq synaıtyn Qaırat Qanapın, Aleksandr Gerlıs jáne Sergeı Ýssolsev, sondaı-aq shańǵymen syrǵanaýshylar Denıs Petrenko, Aleksandr Kolıadın, Jańyl Baltabaevalar bar. Tartysty dodada el baıraǵyn ustaý qurmeti Qaırat Qanapınniń enshisine buıyrǵan. Shyǵaryp salý rásiminde tórt jyl buryn Londonda ótken jazǵy parolımpıada oıyndarynyń jeńimpazy Zýlfııa Ǵabıdýllına sportshylarǵa tabys tilep, el týyn Qanapınge óz qolymen tapsyrdy.
Esterińizde bolsa Sochıde ótken qysqy parolımpıada oıyndaryna bul sportshylardyń úsheýi qatysqan edi. Jarys qorytyndysy boıynsha Aleksandr Kolıadın jıyrma shaqyrymdyq jekelegen jarysta 13-shi, sprınt boıynsha 33-shi orynǵa turaqtaǵan. Al Qaırat Qanapın sprıntte 13-shi, on shaqyrymdyq jekelegen jarysta 17-shi orynnan kórinse, Jańyl Baltabaeva bes shaqyrymdyq jekelegen jarys jolynda 23-shi orynǵa turaqtaǵan edi. Ol kezde jibergen olqylyqtyń ornyn toltyramyz degen parolımpıadashylar, jarysta el namysy úshin bar múmkindigin salatynyn aıtty.
«Bizge senim artyp otyrǵan otandastarymyzdyń, jattyqtyrýshylarymyzdyń úmitin aqtaý úshin aıanbaımyz. Jarysqa tyńǵylyqty daıyndaldyq. Parolımpıada oıyndarynyń ashylý saltanatynda Qazaqstan baıraǵyn alyp shyǵatynyma qýanyshtymyn. Bul maǵan artylǵan úlken jaýapkershilik. Bári jattyǵýdaǵydaı sátimen bolady dep úmittenemin», deıdi Qaırat Qanapın.
Bıylǵy parolımpıada oıyndarynda barlyǵy 80 medal jıyntyǵy sarapqa salynady. Bul Sochıde ótken qysqy olımpıadamen salystyrǵanda 8 medal jıyntyǵynyń artqanyn kórsetedi. Ulttyq shtattyq komandalar jáne Sport rezervi dıreksııasy dırektorynyń orynbasary Alekseı Krıýkovtyń sózinshe altyn medal alǵan sportshyǵa 250 myń, kúmis júldegerge 150 myń, qola medalǵa qol jetkizgenderge 75 myń aqsh dollory kóleminde aqshalaı syıaqy berilmek. Oǵan qosa parolımpıada oıyndarynda 4-oryn alǵan sportshyǵy 30 myń, 5-orynǵa 10 myń, 6-orynǵa 5 myń AQSh dollary kóleminde qomaqty syıaqy tabystalatyn bolady.
– Basqa memlekettermen salystyrsaq Qazaqstanda parolımpıada jeńimpazdary men júldegerlerine beriletin syıaqy mólsheri edáýir kóp. Bul qarsylastaryn ǵana emes, basyndaǵy aýyr dertin jeńýge talpynǵan jarymjan sportshylarǵa jasalǵan úlken qoldaý dep túsinýge bolady. Artylǵan senim men alǵa qoıylǵan maqsat oryndalady dep senemiz, – deıdi Alekseı Krıýkov.
Bizde óz kezeginde gazetimizdiń qalyń oqyrmandarynyń atynan sportshylarymyzdyń jeńispen oralýyna tilektestik bildiremiz.
Arman OKTIаBR,
«Egemen Qazaqstan»
ALMATY