Karıkatýra ónerin kópshilik qaýym tek adam tanymyna ájýáli ázil ákeledi dep túsinedi. Asylynda ol bir sát oı-sanany sergitip, ájýadan bólek áserli oı nuryn shashatyn aýqymy keń óner. Ár qoǵamnyń saıası, áleýmettik, psıhologııalyq, moraldyq bolmys sıpaty osy ónerde qylqalam sheberiniń qııaly arqyly qapysyz qalyptalady.
Bıyl «Egemen Qazaqstan» gazeti kenjelep qalǵan osy ónerdiń keńinen damýyna óz úlesin qosyp, qylqalam sheberleriniń ospaq ónerin oqyrmandarǵa tereń nasıhattaýdy qolǵa alyp otyr. Osy rette tuńǵysh ret gazetimizdiń karıkatýrashylarǵa arnalǵan arnaıy syılyǵy taǵaıyndaldy. Atalmysh konkýrstyń bıylǵy taqyryby – Astana qalasynyń 20 jyldyǵyna arnalady. «Astana aıshyqtary» taqyrybyndaǵy óner dodasyna tómendegi erejeler boıynsha kez kelgen talantty sýretshi óziniń baǵyn synap, babyn baıqaýyna bolady. Endeshe iske sát!
«Egemen Qazaqstan» gazetiniń karıkatýrashylarǵa arnalǵan syılyǵy úshin konkýrsqa qatysý
EREJESI
1. Jalpy erejeler
1.1. Baıqaýdy uıymdastyrýshy – «Egemen Qazaqstan» RG» AQ. Ornalasqan mekenjaıy: Astana qalasy, 010000, «Egemen Qazaqstan» gazeti kóshesi 5/13.
1.2. «Egemen Qazaqstan» gazetiniń karıkatýrashylarǵa arnalǵan syılyǵy úshin konkýrs jylyna 1 ret uıymdas- tyrylady jáne konkýrstyń taqyryby jyl saıyn ózgerip turady. Konkýrs taqyrybyn «Egemen Qazaqstan» RG» AQ redaksııa alqasy bekitedi. Konkýrs týraly habarlandyrý «Egemen Qazaqstan» gazetinde jáne www.egemen.kz saıtynda jarııalanady.
2018 jylǵy karıkatýra konkýrsynyń taqyryby: Astana aıshyqtary.
1.3. Konkýrqa qatysýshylarǵa jasyna baılanysty shekteý qoıylmaıdy.
1.4. Úmitkerlerdiń materıaldary konkýrs jarııalanǵan kúnnen bastap, 3 aı merzim ishinde qabyldanady. Konkýrs qorytyndysy 3 aı merzim aıaqtalǵannan keıingi 5-10 kún ishinde shyǵarylady.
1.5. Konkýrsqa kelip túsken materıaldardy «Egemen Qazaqstan» gazetiniń redaksııa alqasynan quralǵan komıssııa (budan ári – konkýrstyq komıssııa) baǵalaıdy.
2. Negizgi sharttary men talaptar
2.1. Konkýrsqa usynylatyn karıkatýra buryn basqa basylymda nemese ınternet-resýrsta jarııalanbaǵan bolýy tıis.
2.2. Sýretter aq-qara nemese túrli túste bolýy múmkin. Materıaldyń kólemi A4 formatynan aspaýy tıis.
2.3. Eń kóbi 5 jumysqa deıin qabyldanady. Ár karıkatýraǵa ataý nemese aıdar qoıylýy tıis. Materıal elektrondy nusqada usynylǵan jaǵdaıda karıkatýranyń ataý/aıdary faıldyń ataýy retinde saqtalýy kerek.
2.4. Konkýrsqa qabyldanǵan materıal plagıat ekeni nemese buryn basqa basylymda/ınternet-resýrstarda jarııalanǵany anyqtalǵan jaǵdaıda týyndaıtyn quqyqtyq jaýapkershilik sol materıaldy usynǵan qatysýshynyń jaýapkershiliginde bolady.
2.5. Qatysýshy konkýrsqa joldaǵan materıaldarymen birge óziniń tolyq aty-jónin, naqty mekenjaıyn, elektrondy poshtasyn jáne telefon nómirin kórsetýi tıis.
2.6. Qaǵazda salynǵan týyndylar «Karıkatýra konkýrsyna» degen aıdarmen myna mekenjaı boıynsha qabyldanady: Astana qalasy, 010000, «Egemen Qazaqstan» gazeti kóshesi 5/13.
Elektrondy nusqadaǵy faıldar aidarbekg@mail.ru elektrondy poshtasyna qabyldanady.
2.7. Materıaldary konkýrsqa qabyldanǵan avtorlar osy eńbekterin konkýrstan keıin «Egemen Qazaqstan» gazeti (avtoryn kórsete otyryp) óz maqalalaryna ıllıýstrasııa retinde paıdalanýǵa quqyly ekenine kelisim beredi.
3. Syılyqtar men marapattar
Birinshi oryn – 300 myń + dıplom
Ekinshi oryn – 200 myń + dıplom
Úshinshi oryn – 100 myń + dıplom
Konkýrstyq komıssııanyń sheshimimen qosymsha yntalandyrý syılyqtary bolýy múmkin.