Keshe Aqtóbede qoǵamdy nyǵaıtýǵa, qaıyrymdylyqty damytýǵa, azamattyq bastamalardy qoldaýǵa, sondaı-aq múmkindigi shekteýli jandarǵa kómek kórsetýge baǵyttalǵan dástúrli áleýmettik mańyzy bar «Biz birgemiz!» aksııasy ótti, dep habarlaıdy Aqtóbe oblysy ákiminiń baspasóz qyzmeti.
Aqtóbe oblysynyń ákimi Berdibek Saparbaev aksııaǵa qatysýshylardy quttyqtap, múmkindigi shekteýli aqtóbelikterge jumysqa ornalasý úshin joldama berdi. Aksııa aıasynda barlyǵy elý adam jumysqa ornalastyrylmaq.
«Memleket basshysy aıqyndaǵan elimizdiń áleýmettik saıasaty múmkindigi shekteýli azamattardy jan-jaqty qoldaýǵa baǵyttalǵan. Bul suraq qashan da memlekettiń baqylaýynda. Prezıdent tapsyrmalaryna sáıkes bizdiń óńirde áleýmettik máseleler, onyń ishinde múgedekterdi jumysqa ornalastyrý máselesin sheshý basymdyq bolyp tabylady. Búginde oblysta eńbekke jaramdy 5 myńǵa jýyq múgedek azamat bar. Ortasha alǵanda biz olardyń 700-800-in jumysqa ornalastyramyz. Biraq bul jetkiliksiz. Bizdiń maqsatymyz - laıyqty jumyspen qamtamasyz etip, suranysqa ıe mamandyqtarǵa oqytý», - dep atap ótti B.Saparbaev.
Aksııa sheńberinde múgedektigi bar jandardyń qataryndaǵy sheberlerdiń, sýretshiler men ónertapqyshtardyń kórmesi ótti. Olardyń ishindegi eń úlkeni – ekinshi toptaǵy múgedek 89 jastaǵy Hákim Bekmuhamed óziniń aǵashtan jasalǵan jádigerlerin kórsetti.
Sondaı-aq, Aqtóbe qalasynyń ákimdigi, Aqtóbe qalasynyń sal aýrýyna shaldyqqan azamattardy qoldaý qory men aýmaqtyq kásipodaqtar birlestikteriniń arasynda múgedekterdiń quqyǵyn qorǵaý jónindegi yntymaqtastyq týraly memorandýmǵa qol qoıyldy.
Qaıyrymdylyq aksııasy 19 jyl qatarynan ótkizilip keledi. Onyń osy jylǵy urany – «Eńbek jáne jumysqa ornalasý - bul árbir qazaqstandyq úshin yntalandyrý».
Sharany jergilikti bılik organdarynyń kómegimen Aqtóbe qalasynyń sal aýrýyna shaldyqqan azamattardy qoldaý qory uıymdastyrdy. Aksııaǵa memlekettik organdardyń, qoǵamdyq birlestikterdiń basshylary, depýtattar, kásipkerler, mesenattar, eriktiler jáne erekshe qajettilikteri bar azamattar qatysty.