Qazaqstan Parlamentiniń delegasııasy 24-28 naýryzda Parlamentaralyq Odaqtyń Jenevada ótip jatqan 138-shi Assambleıasynyń otyrysyna qatysýda, dep habarlaıdy Senattyń baspasóz qyzmeti.
Delegasııa quramynda senatorlar Sergeı Ershov pen Erik Sultanov, sondaı-aq Májilis depýtattary Baqtııar Máken men Irına Smırnova bar.
Qazaqstan depýtattary qatysqan jalpy pikirsaıystar kóship-qonýshylar men bosqyndar quqyqtaryn qorǵaýǵa baılanysty ózekti máselelerdi sheshýge arnaldy. Ornyqty damýǵa qol jetkizý úshin beıbitshilikti nyǵaıtý, sondaı-aq ornyqty damý maqsattaryn iske asyrýǵa, ásirese, jańartylatyn energııa kózderi salasyna jeke sektordy tartý máseleleri Parlamentaralyq Odaqtaǵy turaqty komıtetterdiń kún tártibine endi.
25 naýryzda Qazaqstan parlamentshileri Assambleıa aıasynda О́zbekstan Olıı Májilisi Zań shyǵarý palatasy Demokratııalyq ınstıtýttar, úkimettik emes uıymdar jáne azamattardyń ózin-ózi basqarý organdary komıtetiniń tóraǵasy Akmal Saıdov bastaǵan delegasııamen kezdesti. Júzdesýshiler eki memlekettiń strategııalyq áriptestigin nyǵaıtýdaǵy Prezıdentter N.Nazarbaev pen Sh.Mırzııoevtiń úlesterin atap ótti.
Qazaqstan Parlamentiniń ókilderi «EKSPO-2017» halyqaralyq kórmesine qatysqany úshin О́zbekstanǵa alǵys aıtty jáne «Jasyl» tehnologııalardy damytý ortalyǵy men «Astana» halyqaralyq qarjy ortalyǵynyń ashylýyna baılanysty aldaǵy múmkindikter týraly áńgimeledi. Áńgime barysynda parlamentaralyq ózara is-qımyl men zań shyǵarý salasyndaǵy tájirıbe almasýdyń keleshegitýraly da aıtyldy.