Iýnýs Emre atyndaǵy túrik mádenıet ortalyǵy Astananyń 20 jyldyq mereıtoıyna syılyq jasamaq. «Túrik fılmderiniń aı saıynǵy kórsetilimi» sharasy aıasynda elorda kórermenderiniń nazaryna úzdik túrik fılmderi usynylady, dep habarlaıdy Astana ákimdiginiń resmı saıty.
Eki baýyrlas el arasyndaǵy mádenı baılanysty nyǵaıtý maqsatynda Iýnýs Emre atyndaǵy túrik mádenıet ortalyǵy Túrkııanyń Qazaqstandaǵy elshiliginiń qoldaýymen Astananyń 20 jyldyǵyna oraı elorda kórermenderiniń nazaryna úzdik túrik kıno týyndylaryn usynbaq.
2018 jyly Astanalyq kórermenniń kózaıymyna aınalǵan «120», «Kóbelektiń túsi», «Sońǵy hat» sııaqty fılmdermen qosa, jańa kınotýyndylar da kórsetiletin bolady. Solardyń biri – tanymal túrik jazýshysy Saıt Faık Abasııanyktyń «Kúnkóris qaıyǵy» atty romanynyń jelisimen túsirilgen «Ekeýmizge bir álem» fılmi.
Bul týyndyny astanalyqtar 31 naýryzda tegin tamashalaı alady.
«Oqıǵa Álı Ryza Efendı, onyń shashtaraz qyzy – Melek, onyń ógeı uly – Hıkmet jáne shashtaraz Kır Dmıtrııdiń ómiri týraly baıandaıdy. Melek Hıkmetti týǵan aǵasyndaı jaqsy kórse, Hıkmettiń oǵan degen sezimi ózgeshe. Melektiń ómiri Býrgazadaǵa Fahrı kelgen soń túbegeıli ózgeredi», - delingen fılminiń ańdatpasynda.
Týyndyny «Atadenızfılm» kompanııasy Býrgazada aralynda 2016 jyly túsirgen bolatyn. Basty rólderdi Erkan Merıch pen Iagmýr Aıdan somdaıdy.
Safa О́ńal men Saıt Faık Abasııanyktyń ssenarııimen túsirilgen «Ekeýmizge bir álem» fılmi 31 naýryzda saǵat 17:00-de «Kerýen» saýda ortalyǵyndaǵy Kınoparkte kórsetiletin bolady.