Aýǵan máselesi Tashkentte talqylandy

Konferensııanyń bas­ty maqsaty Aýǵanstandaǵy jaǵ­daıdy beıbit jolmen retteýdiń negizgi qaǵıdattaryn úılestirý, Aýǵanstan úkimeti men qarýly oppo­zısııa arasyndaǵy kelis­sózder tetigin ázirleý, sondaı-aq osy úderisti qoldaý úshin álem­dik qaýymdastyqtyń birlesken áreketterin úılestirý boldy.

Q. Ábdirahmanov beıbit­shi­lik­­tiń, qaýipsizdiktiń, ynty­maq­tastyqtyń jáne damýdyń óńir­lik úlgisin Ortalyq Azııada qalyptastyrý, sonyń ishinde Aýǵanstanǵa ekonomıkalyq já­ne áleýmettik damýda kóp­jaq­­ty kómek kórsetý, beı­bit­­shi­lik pen qaýipsizdikke tóng­en qaýipke qar­sy turý, son­daı-aq onyń áleýetin nyǵaıtý Qazaqstannyń BUU Qaýipsizdik Keńesindegi ju­mysy basymdyqtarynyń bi­ri bolyp tabylatynyn atap ót­ti.

Tashkent konferen­sııa­sy­nyń qatysýshylary aldynda sóı­legen sózinde О́zbekstan Pre­zıdenti Shavkat Mırzııoev Qazaqstan Prezıdenti Nur­sul­tan Nazarbaevqa BUU Qaýip­siz­­dik Keńesinde osy kezdesýdi sha­qyrýdaǵy bastamasy úshin shyn júrekten alǵysyn bildir­di.

Qazaqstannyń Eýropalyq odaq pen basqa da seriktesteriniń birlesip qarjylandyrý kóme­gi­men Aýǵanstan azamattaryna bilim berý baǵdarlamasyn jalǵastyrý týraly bastamasyn usynǵany belgili. 2010 jyldan bastap Qazaqstan óziniń oqý oryndarynda aýǵan azamat­tary úshin jalpy quny sha­mamen 50 mıllıon dollardy quraıtyn bilim berý baǵ­dar­lamasyn júzege asyrýda. Osy baǵdarlamanyń aıasyn­da 2010 jyldan bastap 2021 jyl­ǵa deıingi kezeń ara­ly­­ǵynda 1000-ǵa jýyq aýǵan aza­maty oqy­tylady.

«2018 jyldyń kúzinde Qazaqstan Astanada «Aýǵans­tan­daǵy áıelderdiń múm­kin­dik­terin arttyrý» týraly halyq­ara­lyq konferensııa ótkizýdi josparlap otyr. Onyń basty maqsaty – Aýǵanstannyń beıbit damýyndaǵy áıelderdiń róli men úlesin, aýǵan áıelderiniń quqyqtary men múmkindikterin eldiń áleýmettik-ekonomıkalyq já­ne saıası salalarynda olar­dyń memlekettik jáne jeke sek­torlarǵa qatysýyn art­ty­rý arqyly keńeıtý máse­le­lerin tal­qylaý», – dedi Q.Ábdi­rah­manov.

Qazaqstan Aýǵanstanǵa jyl saıyn myńdaǵan tonna gýmanıtarlyq júk, onyń ishinde azyq-túlik, janar-ja­ǵar­­maı materıaldary jáne ár­túrli jabdyqtar jet­kize oty­ryp, ekijaqty keli­sim­der men kópjaqty ny­san­daǵy ke­lisimderdiń aıasyn­da teh­nıkalyq jáne gýma­nı­tar­lyq kómek kórsetýdi jal­ǵas­ty­ratyny erekshe atalyp ótti.

Osy oraıda Qazaqstan Pre­zı­dentiniń tóraǵalyq etýi­men 15 naýryzda Astana­da ótken Orta­lyq Azııa memleketteri bas­­shylary kezdesýiniń ná­tı­jesi Aýǵanstannyń áleýmettik-eko­­nomıkalyq damýyna ujym­dyq kómek kórsetilýine jańa múm­­kindikter ashyp otyrǵanyn aı­ta ketý kerek.

Konferensııaǵa Reseı, Qytaı, AQSh, Úndistan, Iran, Pákis­tan, Túrkııa, Birikken Arab Ámirlikteri, Saýd Arabııasy, Qatar, Ulybrıtanııa, Germanııa, Fransııa, Italııa, Japonııanyń syrtqy ister mınıstrleri men BUU, Eýropalyq Odaq, UQShU, ShYU, NATO uıymdarynyń joǵary ókilderi qatysty.

Konferensııanyń qory­tyn­dysy boıynsha Tashkent dek­la­rasııasy qabyldandy, onda Aýǵanstandaǵy jaǵdaıdy saıası turǵydan retteýdiń odan ar­ǵy qadamdary kórsetilip, saıa­sı ret­teý úderisindegi aý­ǵan ta­ra­pynyń negizgi jáne úı­les­ti­rý­shi róli bekitildi. Halyq­ara­lyq konferensııanyń aıasynda Q.Ábdirahmanov AQSh pen Iran delegasııalarynyń bas­shy­larymen ekijaqty kezdesýler ótkizdi.

Serik Ábdibek,

«Egemen Qazaqstan»