Sabyrbek Oljabaı: Elbasy Úndeýi kópshiliktiń kókeıin­degisin dóp basqan tarıhı qujat boldy

Eli­miz egemendik alǵaly eńsergen eńbekterimiz ushan-teńiz ekenine eshkim de daý aıta almas. Degenmen halyqtyń áleý­mettik jaǵdaıyn jan-jaq­­ty oılastyrǵan bul tarıhı qadamnyń qazaqstandyqtar úshin syılar shattyǵy men qýa­ny­shy alabóten. Maǵan ási­rese Elbasynyń «7 – 20 – 25» baǵ­darla­ma­sy erekshe unady. Kóńilim ká­dim­gideı kóterilip qaldy. Nege kóterilmesin, árbir otbasyna bas­pana alýdyń jańa múmkindikteri ashylyp otyrsa. «Jumys isteıtin árbir adam nesıege páter satyp alyp, ony otbasylyq bıýdjetiniń múm­kindikteri aıasynda tóleı alatyndaı bolýy úshin arzan resýrs­tar usynatyn tetikter qajet» dep atap kórsetti Prezıdent. Mun­daı múmkindikter buryn-soń­dy bolmaǵan. Nesıe ósiminiń mól­sher­lemesi qazirgideı 14-16 emes, jylyna 7 prosentten aspaıtyn bolsa, bankter bastapqy jarnaǵa baspana qunynyń 30 prosenti­ne deıin, keıde tipti 50 prosentin talap etse, bul baǵdarlama­da 20 prosentten aspaıdy dep kórsetse, bórkińdi qalaı aspanǵa atpaısyń. Onyń ústine nesıe alýshynyń aı saıynǵy tólemin azaıtý úshin onyń merzimi 10-15 emes, 25 jylǵa deıin bolsa, bul aınalaıyn-aý, ákeń jasamaǵan jaqsylyq emes pe?

Álhamdýlla, qazaqpyz. Qazaq bol­ǵannan soń balajan­byz. «Ur­paq kóbeısin. Bir qozy týsa, bir túp jýsan artyq shyǵady» deımiz. Qudaıǵa shúkir, kópbalaly otbasylar aýylda da, qalada da jetkilikti. Biraq nesin jasyraıyq, kóptegen ákeler balalarynyń barlyǵy­na derlik baspana salyp berýge múmkindikteri bola bermeı­di. Al 2-3 mıllıon teńgege jer satyp ala­ıyq delik. Sonda qurylys materıaldarynyń baǵasy ýshyǵyp turǵan myna zamanda záýlim úı salyp berýge shamam jetedi me? Záýlim úı dep otyrǵanym aqshamnyń tasyp bara jatqanynan emes. Qazir qalada úıdi búgingi zamanǵa saı eńseli de kórikti etip salý jóninde naqty tapsyrmalar berilip jatyr.

Osyny oılap bas qatyp júr­gen­de Elbasynyń «Bes áleý­mettik bastamasy» kókten izdege­nim­di jerden keziktirgendeı bol­­dy. Buǵan qýanbaǵanda endi qaı­da qýanasyz? Bir balama «7 – 20 – 25» baǵdarlamasy boıyn­sha páter alyp berýime endi múm­­kin­dik ashyldy emes pe?

Jalpy, bul qadam Elbasynyń talaıdan beri kókeıinde júr eken. Muny Elbasy Úndeýinde atap kórsetti. Adam qalaı baqytty bolady? О́zińdi qoldap, qorǵaıtyn, qamqorlyq jasaıtyn artynda úlken súıenish bar ekenin sezingende baqytty bolady. Biz osy qamqorlyqty da, súıenishti aıqyn sezinip otyrmyz. Mundaı eldiń bar­lyq turǵyndary baqyttyń qushaǵynda bolary Aıdaı anyq. Súıenishti sezinip, qamqorlyqty qolmen ustap kórgendeı tanyp-bilip otyrǵan halyqtyń týǵan jerge, sol memleketti basqa­ryp otyrǵan tulǵaǵa degen súıispen­shiligi, ystyq yqylasy artary sóz­siz. Elin, jerin jan júregimen súıe­tin Prezıdentimiz barsha qazaq­standyqtardyń taǵy da úmit otyn jaqty. Osyndaı elde ǵumyr keshkenine qýanasyz, maq­tanasyz.

Prezıdenttiń eńbekaqysy tómen adamdar úshin salyqtyq júk­temeni 1 prosentke deıin tó­men­detý týraly tapsyrmasy da qara­paıym adamdarǵa degen úlken qamqorlyq. Rasynda, bireýler az tabys tabady. Bireýlerdiń jumysy á degennen júrip ketpeýi de múmkin. Osyndaıda kásipker bıýdjetke qomaqty qarjy aýdara alady ma? Budan bıýdjettiń búıiri tompaıyp shyǵa keledi me? Men jumysyn jańa basta­ǵan jastardy bilemin.Olardyń ishinde jumystaryn dóńgeletip alyp kete almaı júrgenderi de bar. Elbasy qoldaýy olardy qanat­tan­dyratynyna endi senim mol. Al qanattandyra, qanaǵat­tan­dyra bilý bile bilseńiz, úlken qabi­let. Tipti qudiret desek te asyryp aıt­qandyq bolmas edi.

Sabyrbek OLJABAI, Qazaqstan Jazýshylar odaǵynyń múshesi

Ońtústik Qazaqstan oblysy