2017 jyly Qazaqstan Respýblıkasy bilim berýdi men ǵylymdy damytýdyń memlekettik baǵdarlamasyn iske asyrý qorytyndysy týraly QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda Bilim jáne ǵylym mınıstri E. Saǵadıev pen Ulttyq ekonomıka mınıstri T. Súleımenov baıandady.
Bilim jáne ǵylym mınıstri E. Saǵadıevtiń aıtýynsha, 2017 jyly 64,4 myń orynǵa 849 mektepke deıingi mekeme ashyldy, onyń 717-si jekemenshik mektepke deıingi uıymdar. 3-6 jas aralyǵyndaǵy balalardyń balabaqshaǵa kezektiligi ótken jylmen salystyrǵanda 25,3%-ǵa azaıyp, búginde 125,2 myń adamdy qurady. 2017 jyly elimizdegi balabaqshalardyń orta eseppen 15%-i ınklıýzıvti bilim berýge jaǵdaı jasaǵan.
Orta bilim berý salasynda jańartylǵan bilim mazmunyna kóshý jalǵasýda. 2017–2018 oqý jylynda 1, 2, 5, 7 synyptar jańa júıege kóshirildi. 5 kúndik oqý aptasy engizildi. 2019 jyldan bastap 10–11 synyptarda jaratylystaný baǵytynyń «Fızıka», «Hımııa», «Bıologııa», «Informatıka» 4 pánin aǵylshyn tilinde oqytýǵa daıarlyq júrgizilýde.
TjKB salasynda onyń sapasyn, qoljetimdiligin jáne tartymdylyǵyn arttyrýdyń jańa tásilderi ázirlendi. 2017 jylǵy 1 qyrkúıekten bastap 260 biliktilik boıynsha jańa modýldik baǵdarlamalar engizile bastady, onda mamandyqtyń 3 biliktiligin ıgerý qarastyrylǵan.
Memleket basshysynyń tapsyrmasy boıynsha 2017 jyldan bastap 583 kolledjde «Barshaǵa arnalǵan tegin TjKB» jobasy iske asyrylýda. 100,8 myń adamǵa memlekettik tapsyrys berilgen, onyń ishinde 21 myńy — О́nimdi jumyspen qamtý baǵdarlamasy boıynsha.
Joǵary bilim berý salasynda JOO-lardyń akademııalyq jáne basqarýshylyq derbestigin keńeıtý úshin tıisti zań jobasy ázirlenip, QR Parlamenti Májilisine engizilgen. QS WUR álemniń úzdik ýnıversıtetteriniń reıtingisine 2017 jyly qazaqstandyq 8 JOO kirdi.
«Ǵylym salasynda ǵylym men ekonomıkanyń shynaıy sektorynyń ózara baılanysyn kúsheıtý jáne ǵylymı qyzmet nátıjelerin kommersıalandyrý boıynsha jumystar júrgizilip jatyr. Halyqaralyq ǵylymı-tehnıkalyq ortalyqtyń granttyq qarjylandyrýy aıasynda 12 joba iske asyryldy», — dedi E. Saǵadıev.
Memlekettik baǵdarlamany oryndaý monıtorınginiń nátıjeleri týraly ulttyq ekonomıka mınıstri T. Súleımenov baıandady.
QR UEM derekterine sáıkes, 2017 jyly Qazaqstan Respýblıkasynda bilim berý jáne ǵylymdy damytýdyń 2016–2019 jyldarǵa arnalǵan memlekettik baǵdarlamasynyń 8 maqsatty ındıkatorynyń 7-i oryndaldy, Membaǵdarlamanyń 51 kórsetkishinen – 45-i oryndaldy. 2017 jyly josparlanǵan 166 sharanyń 161-i iske asyryldy.
Sonymen qatar, bilim berý salasyna salynǵan ınvestısııalar 23%-ke ósken. Investısııalardyń jalpy kólemi 265 mlrd teńgeni qurady. Mundaı ósimge MJÁ jobalaryn belsendi túrde iske asyrý yqpal etti. 2017 jyly bilim berý salasynda jalpy sommasy 31,2 mlrd teńge kóleminde 101 jobaǵa kelisim jasaldy. Al 2015–2016 jyldary atalǵan baǵyt boıynsha 4,3 mlrd teńge sommasyna 8 kelisim jasalǵan bolatyn.
Otyrys barysynda Jambyl oblysynyń ákimi A. Myrzahmetovtyń, Aqtóbe oblysynyń ákimi B. Saparbaevtyń, Batys Qazaqstan oblysynyń ákimi A. Kólginovtyń baıandamalary tyńdaldy.
Máseleni qaraý qorytyndysy boıynsha QR Premer-Mınıstri Baqytjan Saǵyntaev búginde Joldaýdy jáne Prezıdenttiń bes áleýmettik bastamasyn iske asyrýǵa baılanysty bilim berý júıesine óte mańyzdy mindetter júktelgenin atap ótti.
Osyǵan oraı Bilim jáne ǵylym mınıstrligine Memlekettik baǵdarlamany jandandyrý boıynsha jumystardy jedeldetý jáne joǵary bilim berýdiń qoljetimdiligi men sapasyn arttyrý jáne stýdent jastardyń jataqhanadaǵy jaǵdaılaryn jaqsartý boıynsha Bes áleýmettik bastamany iske asyrý jónindegi Elbasy tapsyrmalarynyń oryndalýyn qamtamasyz etý tapsyryldy.
QR Premer-Mınıstri Baqytjan Saǵyntaev belgilengen standarttarǵa sáıkes memlekettik baǵdarlama ındıkatorlarynyń oryndalýyn qatań qadaǵalaýdy tapsyrdy.