Tennısten Qazaqstan ulttyq quramasy 6-8 aralyǵynda Horvatııa quramasyna qarsy kezdesý ótkizedi. Devıs kýbogynyń shırek fınaldyq kezdesýiniń aıasynda ótetin oıyn aldynda Dıas Dosqaraev birneshe saýalymyzǵa jaýap berdi. Qazaqstan quramasynyń kapıtany daıyndyq jaqsy júrgizilgenin málimdedi.
- Dıas myrza, apta buryn Aýstrııa elinde jattyǵýdy bastadyńyzdar. Matchqa degen pysyqtaýlaryńyz qalaı ótti?
- Iá, Aýstrııanyń Vena qalasynda apta buryn jattyǵý bastadyq. Endi mine, keshe ǵana Horvatııanyń Varajdın qalasyna kelip otyrmyz. Match ótetin arenaǵa boı úıretip jatyrmyz. Al daıyndyqtyń ózine keler bolsaq, óte sapaly jattyǵýlar ótkizdik. Jigitterdiń barlyǵy jan-jaqtan jınaldy. Kóbisi jarystardan kelip otyr. Jalpy, fızıkalyq jaǵdaılary jaman emes. Endi tek dál osy bolatyn oıynǵa baǵyttalǵan birli-ekili jumystar júrgizemiz. Serbııa quramasyna qarsy oınaǵan kezimizde de Vena qalasyna baryp apta buryn daıyndyq jumystaryn ótkizip edik. Sol kezde jaqsy oıyn órnegin kórsettik. Mańyzdy oıyn aldynda jaqsylap daıyndalǵanymyz jón. Eń bastysy tennısshilerimiz jergilikti aýa-raıyna, saǵat beldeýine úırenisip úlgerdi.
- Horvatııa quramasy jaıly ne aıtasyz? Olarda qol qýsyryp otyrmaǵan bolar?
- Árıne, olarda tyńǵylyqty daıyndalyp jatyr. Bul juptyń jeńimpazy jartylaı fınalǵa joldama alady. Sondyqtan da, búkil álem tamashalaıtyn oıyn óte mańyzdy. Horvatııa quramasy oıynshylar quramyn ózgertti. Bastapqyda Ivo Karlovıchti tirkeýi kerek bolǵan horvattar ol oıynshydan bas tartyp ornyna Nıkola Nektıchti qosty. Degenmen, bul komandanyń negizgi oıynshysy Marın Chılıch ekeni anyq. Álemniń úshinshi raketkasyna qarsy oınaý eshkimge de ońaı soqpaıdy. Odan bólek Borna Chorıch degen tennısshisi qazir óte joǵarǵy deńgeıde óner kórsetip júr. Mysaly, Maıamı men Indıana Ýelstegi jarystarda ol óziniń myqty ekenin kórsetti. Federerdiń ózin utyp jibere jazdady. Osyndaı iri týrnırdiń jarytaı fınalynda oınaý keremet jetistik. Olardan bólek, Ivan Dodıg pen Nıkola Mektıchti de umytpaýymyz kerek. Jalpy alǵanda, Horvatııa quramyndaǵy 5 tennısshi TOP-50-ge kiretin oıynshylar.
- Sonda bul kezdesýdiń favorıti Horvatııa, al Qazaqstanǵa kelesi kezeńge ótetin múmkindik múlde joq pa?
- Oıynǵa deıin jáne qaǵaz júzinde favorıt Horvatııa.Bul tujyrymmen bári kelisedi dep oılaımyn. Onyń ústine oıyn da Horvatııa alańynda ótedi. Biz hard tósenishinde myqty edik. Al olar bizge yńǵaısyz bolsyn dep qum tósenishin tańdap otyr. Horvat quramasy tek osy oıynnyń ǵana emes, sonymen qatar búkil Devıs kýbogy jarysynyń favorıti. Biraq, bul joǵarǵy deńgeıdegi tartys bolǵandyqtan bári de bolady. 5 oıyndyq teke tiresti túrli oqıǵa oryn alady. Qazaqstan quramasy osyǵan deıin nebir ataqty quramalardy jeńdi. Bizdiń jigitterde tájirıbıe jetkilikti. Sondyqtan da, Horvatııaǵa qarsy terezesi teń oıyn ótkize alatyn deńgeıdemiz.
- Áńgimeńizge rahmet!
Áńgimelesken Ermuhamed MÁÝLEN
Horvatııa, Varajdın.