Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda 2018 jyldyń birinshi toqsanyndaǵy ınflıasııa deńgeıi týraly ulttyq ekonomıka mınıstri T. Súleımenov baıandady.
QR UEM málimeti boıynsha, Qazaqstandaǵy ınflıasııa 2018 jyldyń qańtar–naýryz aralyǵynda 1,8% qurady. Aǵymdaǵy jyldyń basynan beri ınflıasııa deńgeıi jańa dáliz – 5-7% aralyǵynda saqtalyp tur.
«2017 jylǵy I toqsanmen salystyrǵanda ınflıasııanyń eki quramdaýyshy boıynsha baǵa ósýiniń báseńdegeni baıqalyp otyr: azyq-túlik taýarlaryna –2,2% (esk. – 2017 jyldyń I toqsanynda 3,2%), azyq-túlik emes taýarlarǵa –1,3% (esk. – 2017 jyldyń I toqsanynda 1,7%) qurady. Sonymen qatar, aqyly qyzmetterge baǵalar men tarıfter ótken jyldyń deńgeıinde – 1,7% saqtaldy», — dedi Tımýr Súleımenov.
Qaraqumyqqa – 12,6%, jumyrtqaǵa –1,1%, kúrishke – 1% jáne kúnbaǵys maıyna 0,2% baǵalar tómendedi. Sondaı-aq, qyryqqabatqa, kartopqa, pııazǵa, jemisterge, temeki buıymdaryna baǵanyń óskeni baıqalady.
Azyq-túlikke jatpaıtyn taýarlarda baǵanyń eń tómengi ósýi (1,3%) baıqaldy. Birqalypty qarqynmen (1,7%) aqyly qyzmetterdiń baǵasy ósken. Aqyly qyzmetter ishinde eń joǵary baǵa ósimi quqyqtyq (6%-ke) jáne poshta qyzmetterinde (4,3%) tirkelgen. Sonymen qatar, áýe kóligi qyzmetterine (8,5%) jáne kólik quraldaryna tehnıkalyq qyzmet kórsetýde (3,4%) baǵanyń aıtarlyqtaı tómendegeni baıqalady.
О́ńirler turǵysynan alǵanda, jyl basynan beri 10 óńirde ınflıasııa ortasha respýblıkalyq kórsetkishten tómen deńgeıde.
Sonymen qatar, 6 óńirde ınflıasııa ortasha respýblıkalyq deńgeıden joǵary. Bul Soltústik Qazaqstan (2,5%), Pavlodar (2,3%), Qyzylorda (2,3%), Shyǵys Qazaqstan (2,1%), Ońtústik Qazaqstan oblystary (1,9%) jáne Almaty qalasy (1,9%).
«Inflıasııanyń jańa aralyǵynan (5-7%) asyp ketpeý úshin, kórsetilgen óńirler baǵa ósýin tejeý maqsatynda qajetti sharalardy qabyldaýy qajet. Basqa óńirler ınflıasııanyń tómengi qarqynyn saqtaýy kerek», — dedi Tımýr Súleımenov.
QR Premer-Mınıstri Baqytjan Saǵyntaev tıisti mınıstrlikter men vedomstvolardyń basshylaryna, óńirlerdiń ákimderine áleýmettik mańyzdy taýarlardyń baǵalaryna baqylaý jasaýdy jáne ınflıasııanyń negizsiz ósýin boldyrmaýdy tapsyrdy.
Baqylaý jumystary Premer-Mınıstrdiń orynbasary E. Dosaevqa júkteldi.