«Qudaı saqtady» degen osy shyǵar. Zyrıan aýdanynyń Maleev aýyly turǵyndaryn sý tasqynynan qutqarý jumystarynyń basy-qasynda júrgen aýdan ákiminiń orynbasary Janna Asqarova janyndaǵy úsh kisimen birge sýǵa ketip qala jazdap, Allanyń alqaýymen aman qaldy.
Oqıǵa bylaı bolypty. 31 naýryzdan 1 sáýirge qaraǵan túni aýdan ákimdigi qyzmetkerleri sý basqan Maleev aýylynyń turǵyndarynyń keıbirin aýyl mektebine ornalastyryp, keıbirin avtobýstarmen Zyrıan qalasyna tası bastaıdy. Bir ýaqytta aýyldaǵy bir kóshede qutqarylmaǵan adam bar degen habar jetedi. Qol qýsyryp, qarap turatyn ýaqyt emes. «Nıvaǵa» otyryp sol kóshege qaraı tartady. «Ákimdikten kólik kelip, aýdan ákiminiń orynbasary Janna Asqarova qandaı kómek qajettigin surady. Bizben sóıleskennen keıin kelesi úıge qaraı ketti. Bul kezde tasqyn sýy joldy basyp bara jatqan edi. Bir mezette ekpini qatty qarǵyn sý kólikti aǵyza jóneldi», - deıdi oqıǵaǵa kýá bolyp, sońynan aýyl turǵyndaryn kómekke shaqyrǵan Maleev eldi mekeniniń turǵyny Evdokııa Sanarova.
Kólik ishinde J.Asqarovamen birge Maleev aýyldyq okrýgi ákimdiginiń bas mamany Natalıa Zaıseva, mektep dırektory Aıgúl Bashaeva men júrgizýshi Aleksandr Habarov bolǵan eken. «Kólikti qap-qara tasqyn shyr aınaldyryp áketti. Aınala tastaı qarańǵy, sýdyń gúrilinen basqa eshteńe estilmeıdi. Áýelde kómekke shaqyryp aıǵaılap kórip edik, nátıje shyqpady. Bir kezde kólikke sý kire bastady. Aıaqtan órlegen sý keýdege jetkende, ómirden kúder úzip, otbasymyzǵa habarlasa bastadyq. Úı-ishimizben qoshtasyp jatqanda basqa kóliktiń jaryǵy kózge shalyndy. Bizdi izdep júrgen shyǵar degen úmitpen telefonnyń shamyn jaǵyp, belgi berýge tyrystyq. Sol áreketimizden nátıje shyǵyp, izdeýshiler bizdi taýyp aldy. Talǵat esimdi jigit kóliktiń terezesin teýip syndyryp, bizdi kezekpen syrtqa shyǵardy. Olardyń isi naǵyz erlik edi. О́z bastaryn táýekelge tigip, bizdi qutqardy», - deıdi aýdan ákiminiń orynbasary.
Qansha degenmen áıel adamnyń aty áıel adam ǵoı. «Sýyq tıgizip alǵan joqsyz ba? Densaýlyǵyńyz qalaı? Bálkim, ýaqytsha demalys alarsyz», - dep suradyq. «Anam men sińilim de telefon soǵyp, alańdaýshylyǵyn bildirip jatyr. Men olarǵa: «Qudaı ajaldyń aýzynan saqtady. Aýrýdan da saqtaıdy» dep basý aıttym. Aýdanda tótenshe jaǵdaı rejımi áli alynǵan joq. Buqtyrmanyń sýy túse bastaǵanymen, ondaǵan úı muz ben sýdyń qusaýynda tur. Sondyqtan áli de saǵatpen sanaspaı jumys isteýge májbúrmiz. Tasqyn saldary joıylyp, jaǵdaı turaqtalǵan soń, tolyq medısınalyq tekserýden ótetin shyǵarmyn» - dep qysqa qaıyrdy.
Reti kelgende aıta keteıik, qazirgi ýaqytta Zyrıan aýdanynyń bir emes, birneshe aýylyn sý basyp jatyr. Oblystyq Tótenshe jaǵdaılar departamentiniń taratqan málimetterine súıensek, aýdandaǵy 300-den astam úı sý astynda qalyp otyr. Sońǵy birneshe kúnde aýdanda 811 (onyń 200-ge jýyǵy - balalar) turǵyn qaýipsiz jerge kóshirilipti.
Azamat QASYM,
«Egemen Qazaqstan»
Shyǵys Qazaqstan oblysy,
Zyrıan aýdany