Senat depýtaty Sergeı Ershov Qaraǵandy qalasynda «Nur Otan» partııasynyń oblystyq aktıv ókilderimen kezdesti.
Senator Prezıdent N.Á.Nazarbaevtyń bes áleýmettik bastamasyn iske asyrý tetikteri týraly aıta kelip, elimizdiń Úkimeti ázirlegen «Prezıdenttiń bes áleýmettik bastamasy» jol kartasynyń mazmuny jaıynda partııa ókilderin habardar etti. Kezdesýge qatysýshylar depýtatqa «7-20-25» jáne «Serpin-2050» baǵdarlamalaryna, stýdenttik jataqhanalar qurylystary men oqý oryndary túlekterin jumysqa ornalastyrýǵa qatysty birqatar saýaldar qoıdy.
Kezdesý barysynda sport salasynyń, onyń ishinde joǵary dárejedegi sport nysandarynyń qurylysy, buqaralyq sportty damytýdaǵy salalyq kásipodaqtardyń rólin kóterý, sportqa jaqyn daryndy balalarǵa arnalǵan oblystyq arnaýly mektep-ınternattyń quqyqtyq mártebesin bıiktetý jónindegi ózekti máseleler kóterildi.
S.Ershov Kásipodaq úıinde oblystaǵy salalyq kásipodaqtyń (mádenıet, aýyl sharýashylyǵy, qurylys, turǵyn úı-kommýnaldyq sharýashylyǵy, kómir ónerkásibi jáne basqa da salalar) aýmaqtyq qurylymdarynyń jáne «KásipQazaqmys» kásipodaǵynyń tóraǵalarymen áńgimelesti. Senator Memleket basshysynyń bes áleýmettik bastamasyn iske asyrý tetikteri týraly jan-jaqty áńgimeledi jáne aımaqty damytýdyń keleshegi týraly óz oılarymen bólisti.