Qazaqstan Respýblıkasy Bas prokýratýrasy qylmystyq jolmen alynǵan jáne elden tysqary jerge zańsyz shyǵarylǵan múlikti qaıtarý boıynsha jumystardyń nátıjesinde Shveısarııanyń «RothschildBankZurich» bankinen 1,3 mıllıonnan astam AQSh dollary kólemindegi qarajatty anyqtady.
Bul týraly QR Bas prokýratýrasynyń baspasóz qyzmetinen habarlady. Belgili bolǵandaı, qarjy M. Abdralıevke tıesili, ol 2012 jyldan bastap halyqaralyq izdeýde júr. M. Abdralıev «Qorǵas isi» boıynsha qylmystyq qaýymdastyqtyń músheleri T. Jaqaevqa, I. Ábdirahmanovqa jáne B. Qurmanalıevke shet memleketterde aqshalaı qarajatty zańdastyrýǵa kómektesti degen kúdikke ilingen. Osyǵan baılanysty prokýror shveısarııalyq banktegi aqshalaı qarajatty tárkileý týraly ótinishhatty sotqa joldady.
Bıyl 29 naýryzynda Almaty qalasynyń Almaly aýdandyq soty prokýrordyń ótinishhatyn qanaǵattandyrdy. Odan basqa, atalǵan qylmystyq is boıynsha sotqa deıingi tergep-tekserý barysynda «TAT Kredıt» JShS-nyń keńsesin tintý kezinde M. Abdralıevke tıesili 762 myń AQSh dollary jáne 915 myń teńge alyndy.
Prokýratýra aqshalaı qarajatty tárkileý úshin sotqa tıisti ótinishhat joldady. Nátıjesinde prokýratýra organdarynyń bastamasy boıynsha 2,1 mln astam AQSh dollary memlekettiń paıdasyna tárkilendi. Atap ótý qajet, qylmystyq-prosestik zańnamaǵa ózgeristerdiń engizilýine baılanysty bıyldan bastap úkim shyqqanǵa deıin zańsyz jolmen alynǵan múlik tárkilenedi.