Bolashaq – bilimdi jastardyń qolynda. Búgin Astanada Konstıtýsııalyq Keńestiń uıytqy bolýymen uıymdastyrylǵan esse baıqaýy máresine jetip, úzdikteri marapattaldy. Oǵan elimizdiń ár óńirindegi joǵary oqý oryndarynyń stýdentteri men Astana qalasyndaǵy mektep oqýshylary qatysyp, baǵyn synady.
Saltanatty jıynǵa Konstıtýsııalyq Keńes tóraǵasy Qaırat Mámı, Bilim jáne ǵylym vıse-mınıstri Ashat Aımaǵambetov, Konstıtýsııalyq Keńes múshesi Ýnzıla Shapaqqyzy, Qazaqstan Respýblıkasy Tuńǵysh Prezıdenti – Elbasy Qorynyń atqarýshy dırektorynyń keńesshisi Álııa Qaısharova qatysty.
Kezdesýde alǵysózdi alǵan Qaırat Mámı Konstıtýsııanyń mańyzdylyǵyn egjeı-tegjeıli túsindirip berdi. Sonymen qatar Qazaqstannyń damyǵan 30 eldiń qataryna kirýine kúsh salatynyn aıta kelip, bul jolda bilimdi jastardyń orny erekshe ekenin eske saldy.
Konkýrs Konstıtýsııanyń kemeldi qýattylyǵyn nyǵaıtý, ony keńinen nasıhattaý, sondaı-aq jastardyń quqyq salasyndaǵy bilimin arttyrý maqsatynda uıymdastyryldy. Tutastaı alǵanda respýblıkanyń túkpir-túkpirinen bas-aıaǵy 429 jumys túsipti. Onyń 283-in stýdentterden kelse, qalǵan 146 esseni elordalyq oqýshylar jazǵan.
О́z kezeginde Ashat Aımaǵambetov mundaı aýqymdy is-shara alǵash ret ótip otyrǵanyn aıta kelip, jastardyń quqyqtyq mádenıetin arttyrý mańyzdy ekenin jetkizdi.
Baıqaýdyń qorytyndysy boıynsha stýdentter arasynda 1-oryn alǵan Qazaq ulttyq ýnıversıtetiniń 2-kýrs stýdenti Dastan Qastaı ata-babamyzdyń zańǵa burynnan jaqyn ekenin aıtyp, oıymen bólisti.
– Tarıhqa kóz júgirter bolsaq, túrki halqynyń dala zańdar jınaǵy bolǵan. Odan keıin Shyńǵys handy alaıyq, «Jasaq» zańdar jınaǵy kópshilikke belgili. Sol sııaqty Abaıdyń kópshilik bile bermeıtin 74 baptan turatyn «Qaramolla» erejesi bar. Mine osyǵan qarap-aq babalarymyz tártipti sol kezde ornatyp úlgergenin baıqaýǵa bolady. Al Eýropa ol kezde áli feodaldyq qursaýda jatqan edi, – deıdi órenimiz.
Al oqýshylar arasynda 1-oryndy ıelengen Astana qalasy №48 mektep-lıseıiniń 11-synyp oqýshysy Aıbıbi Erjanqyzy bolashaqta zań salasynda qyzmet etýdi armandaıtynyn aıta kelip, mundaı jarystar aldaǵy ýaqytta kóbirek uıymdastyrylsa eken degen tilegin jetkizdi.
Marapattaý rásimi aıaqtalǵannan keıin Ýnzıla Shapaqqyzy Konstıtýsııalyq Keńestiń qyzmeti týraly baıandama jasady. Al jýrnalısterge bergen pikirinde ol el úmitin aqtaıtyn, Konstıtýsııany qurmetteıtin patrıot jastardyń jańa býyny ósip kele jatqanyna senimdilik bildirdi. Sonymen qatar oqýshylar arasyndaǵy esse jarysy respýblıka kóleminde uıymdastyrý josparda baryn jasyryp qalmady.
Aıan ÁBDÝÁLI, «Egemen Qazaqstan»