Elbasy Úndeýin sportshylar jyly qabyldady

Elbasynyń sportshylar qaýymyna degen kózqarasy men iltıpaty erekshe ekenin jalpaq jurt jaqsy biledi. Ásirese Olımpııa oıyndary barysynda sol qamqorlyq anyq seziledi. Jeńis tuǵyryna kóterilgen sańlaqtarǵa memleket tarapynan mol kólemde syıaqy beriledi. Olar túrli orden jáne medaldarmen marapattalady. Uly dúrmekte jeńimpazdar jáne júldegerler atanǵan sańlaqtarǵa kezekten tys páter kilti tabys etilip, olar temir tulpardy tizgindeıdi.

Múmkindigi shekteýli jan­dar­dyń basyn qosatyn Paralım­pıada oıyndarynda atoı salǵan sportshylarǵa da memleket tarapynan kórsetiletin qamqorlyq aıryqsha. Máselen, 2016 jyly Rıoda altynnan alqa taqqan júzýshi Zúlfııa Gabıdýllına­ǵa – Tarazda jáne sol jarys­ta kúmis alǵan paýerlıftıng sheberi Raýshan Qoıshybaeva­ǵa – Taldyqorǵanda páter berildi. Al kúni keshe ǵana Phenchhanda top jarǵan shańǵyshy Aleksandr Kolıadın Qostanaıda baspana­ly boldy. Árıne bul qýantar­lyq jaıt!

Alaıda Olımpıada nemese álem chempıonatynda jeńis tuǵyryna kóterilý baqyty bárine birdeı buıyra bermeıdi. Aramyzda joǵaryda atalǵan jarystardan bólek, basqa da dúbirli dodalarda el namysyn abyroıly qorǵap júrgen sportshylar jeterlik. Onyń ishinde Olımpıada baǵdarlamasyna enbegen sport túrleri bar. Jalyndap ósip kele jatqan jas órenderdiń de qatary mol. Osy salada eńbek etip, jarǵaq qulaqtary jastyqqa tımeı júrgen bapkerler taǵy bar. Jasyratyny joq, olardyń basym bóliginiń jalaqylary mardymsyz. Birazy páter jaldap tursa, taǵy birazy týǵan-týystarynyń úılerin panalaý­da. Bir sózben aıtsaq, sportshylar qaýymy arasynda da áleý­mettik jaǵdaıy tómen jandar jıi kezdesedi.

Sol sebepti de Elbasynyń «Árbir otbasyna baspana alý­dyń jańa múmkindikterin berý» atty bastamasyn sportshylar qaýymy jyly qabyldady. Ási­rese aıryqsha zor áleýmettik ma­ńyzy bar bul bastama úısiz-kúısiz júrgenderdiń kóńilinen shyqty. Endi olar «7 – 20 – 25» baǵ­darlamasy boıynsha qolje­timdi páter alýdy kózdeýde.

Ǵalym SÚLEIMEN, «Egemen Qazaqstan»