L.Gýmılev atyndaǵy Eýrazııa ulttyq ýnıversıtetinde «Bilim jáne ǵylym - 2018» atty HIII halyqaralyq ǵylymı konferensııa ótti. Is-sharaǵa elimizdegi ǵylym qyzmetkerleri kúnine oraı, Qazaqstannyń barlyq óńirlerinen Jas ǵalymdar keńesteri jınaldy.
Alqaly jıyndy Qazaqstan Respýblıkasy Tuńǵysh Prezıdenti – Elbasynyń Qory jáne L.Gýmılev atyndaǵy ordaly oqý orny birlesip uıymdastyrdy. Kezdesý barysynda qazaqstandyq jas ǵalymdar ǵylym salasyndaǵy qarqyndy qadamdardyń bolashaǵyn talqylady.
Konferensııany Eýrazııa ulttyq ýnıversıtetiniń ǵylymı-zertteý jumystary boıynsha prorektory Gúlnar Merzadınova júrgizip otyrdy. Moderator aıtyp ótkendeı, keleli keńestiń negizgi maqsaty da sol, jas ǵalymdardyń shyǵarmashylyǵyn belsendi damyta otyryp, olardy zamanaýı ǵylymnyń ózekti mindetterin sheshýge qatystyrý. Sonymen qatar, mundaı mańyzdy is-sharalar bolashaq ǵalymdardyń arasynda áriptestik baılanys ornatady.
Elbasy qory atynan Sergeı Tohtarov quttyqtaý sóz sóılep, baıandamashylarǵa sáttilik tiledi. «Jastardyń shyǵarmashylyq, ǵylymı-zertteý jumystaryn nasıhattaý men ony keń kólemde jarııalaýda, olardyń tulǵalyq damýdyń tásili retindegi jobalyq zertteý is-áreketterine tartýda jáne bilim berý úrdisiniń tıimdiligin kóterý men qoldanbaly ǵylymǵa degen qyzyǵýshylyqtaryn damytýda osy taqilettes jıyndardyń mańyzy zor», dedi S.Tohtarov.
Bıylǵy jyly konferensııa 13 seksııa jáne 58 shaǵyn seksııa boıynsha ótti. Baıandamashylar «Ǵylym jáne bilim - 2018» atty taqyrypta toptasyp, óz eńbekterin qazaq, orys, aǵylshyn tilderinde zamanaýı kommýnıkasııalardyń problemalary, sıfrlyq dıplomatııa jáne elimizdegi úsh tildilikti damytý sııaqty taqyryptar aıasynda órbitti.
Konferensııaǵa qatysýshylardyń jalpy sany bıyl eki myńnan asqan. HIII halyqaralyq konferensııanyń taǵy bir ereksheligi, 35 jasqa deıingi stýdentter, magıstranttar, doktoranttardan bólek, jıynda orta mektep túlekteri, Nazarbaev zııatkerlik mektepteriniń oqýshylary da boldy.
Osymen 13 márte ótkizilip otyrǵan osynaý mańyzdy shara jyl saıyn birneshe zertteý úrdisterin qamtýǵa tyrysady. Osy joly Qazaqstannyń barlyq óńirlerinen kelgen jas ǵalymdar keńesiniń tóraǵalary Tuńǵysh Prezıdent – Elbasy Qorynyń janyndaǵy Jas ǵalymdar keńesi tóraǵasy orynbasarlarynyń qatysýymen semınar-keńes ótkizdi.
Jas ǵalymdardyń dástúrge aınaldyrǵan atalmysh bas qosýlary elimizdiń erteńgi ǵylymyna ólsheýsiz úles, keleshegine kemel úlgi bolarlyq. Qadaý-qadaý oılar aıtylyp, jaryssózde jalyndaǵan jas ǵalymdar jigerlene jetistik belesterine bastar joldy aıqyndady.
Respýblıkamyzdyń ǵylymı zertteý ınstıtýttary men belgili joǵarǵy oqý oryndarynyń jas ǵalymdary ǵylymı trendterdi talqylaýmen qatar, olardyń maǵynasyna túsinikteme berdi.
Semınar-keńes barysynda baıqaǵanymyzdaı, jas ıdeıa generatorlary bolashaqta fokýs-toptyq suhbat ótkizýdi josparlap otyrǵandaryn aıtty. Qatysýshylarmen júrgiziletin ol saýalnama ǵylymnyń problemalaryn jáne olardy qandaı ıdeıalar yntalandyratynyn anyqtamaq.
Kezdesý barysynda Tuńǵysh Prezıdent Qory osy baǵytta zamanaýı aǵymdardy eskere otyryp, aldaǵy ýaqytta jastardyń birneshe baǵdarlamalarynyń tusaýkeserin ótkizýdi josparlap otyrǵandyqtaryn aıtty.
Mıras ASAN,
«Egemen Qazaqstan»