Aıagózde qonys toıy jalǵasýda. Búgin qarǵyn sýdan úıleri zardap shekken taǵy 13 otbasyna saltanatty túrde páter kiltteri tabys etildi. dep habarlady ShQO ákiminiń baspasóz qyzmeti.
Qazir Shyǵys Qazaqstanda kóktemgi apattyń saldaryn joıý jumystary qarqyndy júrgizilýde. Máselen, Aıagózde Semeı qalasy men Tarǵabataı aýdanynyń 5 qurylys kompanııasy jumys istep jatyr. Buǵan deıin 118 mıllıonnan astam teńgege 28 otbasyna turǵyn úı satylyp alynǵany habarlanǵan edi. Búgin olardyń qatary 13-ke tolyqty. Budan bólek Qazaqstan Musylmandary Dinı basqarmasy jáne «NFS Kazakhstan» JShS qoldaýymen 2 januıa baspanaly boldy. «Bıylǵy kóktem bizdiń óńir úshin ońaı bolǵan joq. Tasqynnan 2 qala, 5 aýdan, 33 eldi meken zardap shekti. Qazirgi tańda arnaıy komıssııa jumys istep jatyr, qarajat bólindi. Oblys boıynsha 23 qurylys uıymy jóndeý-qalpyný keltirý jumystaryn júrgizýde», - dedi saltanatty jıynda sóz alǵan oblys ákiminiń orynbasary Ásem Núsipova.
Aýdan ákimi Baqytjan Baıahmetovtiń aıtýynsha, qazirgi ýaqytta jóndeý jumystary júrgizilýi tıis 92 úıdiń 65-inde jóndeý júrgizilip jatyr. «12 úı baqylaýda, qalǵan 15-iniń jóndeý merzimi ıeleriniń qalaýymen keıingi shegerildi», - deıdi ol.
Aıagóz aýdanyna jumys saparymen barǵan oblys ákiminiń orynbasary Á.Núsipova aldaǵy ýaqytta Aıagóz jáne Zyrıan aýdandarynda zamanaýı qurylǵylarmen jabdyqtalǵan ınsýlt ortalyqtary ashylatynyn jetkizdi. Sonda Aıagózde Úrjar, Tarbaǵataı, Jarma, Zyrıan aýdanynda Kúrshim men Katonqaraǵaı aýdandarynyń turǵyndary em qabyldaıtyn bolady.