«Samuryq-Qazyna» AQ-da 2018-2028 jyldarǵa arnalǵan jańa Damý strategııasy qabyldandy jáne Transformasııa baǵdarlamasy jańartyldy. Qujat operasııalyq jáne ınvestısııalyq qyzmeti tolyǵymen kommersııaǵa baǵyttalǵan «Temasek» (Sıngapýr), «Khazanah» (Malaızııa) jáne «Mubadala» (Birikken Arab Ámirlikteri) tárizdi tabysty táýelsiz qorlardyń tájirıbesin eskere otyra ázirlendi.
Jańa Strategııaǵa sáıkes, Qor Qorjyn kompanııalardyń kirisin kóbeıtý arqyly ulttyq ál-aýqatty arttyrýǵa basymdyq beremek.
«Samuryq-Qazyna» AQ jańa Strategııasynda úsh negizgi maqsatty belgiledi: kompanııalardyń tıimdiligin arttyrý, «Samuryq-Qazyna» portfelin (aktıvterdi) tıimdi basqarý jáne turaqty damý. Bul maqsattar 4 strategııalyq bastama arqyly júzege asyrylady:
Birinshi – kompanııalardyń qarjylyq turaqtylyǵyn nyǵaıtý arqyly kompanııalardyń tabystylyǵyn arttyrý, Transformasııa baǵdarlamasyn júzege asyrý jáne sıfrlandyrý, bıznes pen uıymdastyrý qurylymyn ońtaılandyrý arqyly áleýetti anyqtaý;
Ekinshi - qorjyn kompanııalardyń portfeldik qurylymyn ońtaılandyrý. Bul baǵytta Jekeshelendirý baǵdarlamasyn júzege asyrýdy aıaqtaý, ınvestısııalyq jobalar portfelin qaıta qarastyrý jáne strategııalyq emes aktıvterden shyǵý arqyly strategııalyq seriktesterdi tartý josparlanǵan;
Úshinshi – kiristi ártaraptandyrý. Bul qazaqstandyq bıznespen jáne sheteldik áriptestermen tıimdi birlesken ınvestısııalar arqyly jeke kapıtaldy damytýǵa baǵyttalǵan;
Tórtinshisi – korporatıvti basqarý jáne turaqty damý.
Osy maqsattardy iske asyrý - Qordyń jańa qurylymyn engizýge, qarjylyq turaqtylyqty nyǵaıtýǵa, ınvestısııalyq tartymdylyqty arttyrýǵa, qarjyny tıimdi basqarýdy qamtamasyz etýge jáne aktıvterdi ulǵaıtýǵa múmkindik beredi. Bul mindetterdiń sapaly júzege asýyn qamtamasyz etý úshin Qordyń aktıvter portfeli qaıta qurylymdanady. Qazirgi ýaqytta, 332 kompanııany qamtıtyn Qordyń aktıvterdi basqarý júıesi qurylymy kúrdeli 5-6 deńgeıden turady. Bul júıe basqarý jumysyn qıyndatýda. Sondyqtan, Jekeshelendirýdiń Keshendi josparyna sáıkes, Qor qurylymynan 51 kompanııa shyǵarylady. Túsken tabysty qaıta ınvestısııalaý barysynda taǵy 102 beıindi emes kompanııa aktıvter qatarynan shyǵarylady.
Osylaısha, Qor qurylymyna kiretin kompanııalar sany 332-den 179-ǵa deıin qysqartylyp, basqarý deńgeıi kúrdeli 5-6 deńgeıden 3-ke deıin azaıady. Nátıjesinde «Samuryq-Qazyna» Qorynyń basqarý qurylymy mobıldi bolady.
Jańa Strategııada halyqaralyq ınvestısııalar portfelin strategııalyq qadaǵalaýdy Qordyń Basqarý keńesi júzege asyratyny naqtylanǵan. Ekonomıkadaǵy shoǵyrlaný kórsetkishiniń tómendeýi, jergilikti ınvestorlardyń jylystamaýy, qordyń halyqaralyq deńgeıdegi ornynyń nyǵaıýy jáne tehnologııalar men bilim arqyly paıda tabý - osy ınvestısııalardyń artyqshylyǵy bolmaq.
Jańa Strategııaǵa sáıkes, áleýmettik ınvestısııalar «Temasek» jáne «Khazanah» kompanııalarynyń tájirbıesine negizdelip, tek bilim berýge, «adam kapıtalyna» jáne ınnovasııalar qurýǵa baǵyttalatyn bolady.
Esterińizge sala keteıik, 2018 jylǵy sáýirdiń 19-y, Qazaqstan Respýblıkasynyń Prezıdenti Nursultan Nazarbaev «Samuryq-Qazyna» ulttyq ál-aýqat qoryn basqarý jónindegi keńestiń otyrysynda «Samuryq-Qazyna» AQ 2018-2028 jyldarǵa arnalǵan jańa Damý Strategııasyn jáne jańartylǵan Transformasııa Baǵdarlamasyn maquldady jáne bekitti.
Sondaı-aq, Memleket basshysy Qordy damytýǵa baǵyttalǵan jumystarǵa oń baǵa berdi.