Qazaqstan Respýblıkasy Densaýlyq saqtaý mınıstri Eljan Birtanov Oral qalasyna jumys saparymen kelip, Oral qalalyq №3 emhananyń jumysymen tanysty. Densaýlyq saqtaý salasyn sıfrlandyrý boıynsha pılottyq joba qolǵa alynǵan Batys Qazaqstan oblysynda elektrondy kezek júıesi, «Pasıent kabıneti» mobıldi qosymshasy tájirıbeden ótýde.
Elektrondyq kezek júıesi óte qolaıly, emhanaǵa kelgen pasıenttiń JSN nómirin arnaıy qurylǵyǵa jaqyndatqan kezde, ol adamnyń barlyq dárigerlik málimetteri monıtorda daıyn turady. Bul dárigerlerdi qaǵazbastylyqtan aryltyp, altyn ýaqytyn qujat toltyrýǵa emes, naýqaspen sóılesip, em jasaýǵa arnaıtyn bolady – elimizde qolǵa alynyp jatqan jańa jobanyń artyqshylyqtarynyń biri osyndaı. Mınıstr qanatqaqty joba aıasynda qoldanysqa engizilip jatqan ózgeristermen jaqyn tanysty.
Batys Qazaqstan oblysynda qolǵa alynǵan jańa jobanyń biri – trıaj júıesi. Aýrýhana edenindegi qyzyl, sary, jasyl jolaqtar naýqastyń qaı topqa jatatyndyǵynan habar beredi. Máselen, qyzyl tús – aýyr dáreje, sary tús- orta dáreje, jasyl tús – tekserilip, kómek kórsetiletin dárejedegi naýqastar ekendigin bildiredi.
Mınıstrge óńirde qolǵa alynyp jatqan jobalar týraly tanystyrǵan Batys Qazaqstan oblysynyń ákimi Altaı Kólginov memlekettik jekemenshik áriptestik aıasynda «Djeneral elektrık» fırmasynan jańa MRT apparaty alynatynyn málimdedi.
- О́zge óńirlermen salystyrǵanda Batys Qazaqstan oblysyndaǵy densaýlyq saqtaý baǵdarlamasynyń ındıkatorlary joǵary. Máselen, ana men bala óliminiń kórsetkishi tómen, naýqas sany únemi baqylaýda. Densaýlyq salasyndaǵy ınvestısııa kólemi de jyl saıyn ósip keledi, - dedi densaýlyq saqtaý mınıstri Eljan Birtanov.
Qazbek QUTTYMURATULY,
«Egemen Qazaqstan»
Oral qalasy