Astana qalasynyń mektepterinde oqıtyn, bolashaqta jýrnalıst bolýdy armandaıtyn bir top oqýshy keshe «Egemen Qazaqstan» gazetinde qonaqta boldy.
Kezdesýde basylym basshysy Darhan Qydyráli oqýshylarǵa «Egemen Qazaqstan» gazetiniń tarıhy, ony ár jyldary basqarǵan Alash qaıratkerleri týraly áńgimelep, óndiristik-shyǵarmashylyq jumystyń barysymen tanystyrdy. Sondaı-aq elimizdegi joǵary oqý oryndarynyń stýdentterine arnalǵan «Egemen akademııasy» jumys istep jatqanynan da habardar etti. Bolashaqta jýrnalıstıka mamandyǵyna túsken stýdentter osy «Egemen akademııasy» arqyly qazaq jýrnalıstıkasynyń ustahanasy sanalatyn bas basylymnyń tájirıbesimen, búgingi zamanaýı medıa-trendtermen tanysa alatyndyǵyn atap ótti.
Kezdesýge kelgen oqýshylar da jalpy jýrnalıstıkaǵa, gazet óndirisine jáne qazaq tiliniń latyn grafıkasyndaǵy álipbıine qatysty ózderin qyzyqtyratyn saýaldaryn qoıyp, egjeı-tegjeıli jaýap aldy. Sonymen qatar gazettiń búgingi sany qalaı ázirlenip jatqanyn kórip, betteý-dızaın bóliminiń jumysymen tanysty. Basylym basshysy oqýshylarǵa izgi tilegin arnap, «Egemen Qazaqstan kitaphanasy» serııasymen shyqqan kitaptardy tartý etti.
Aıta keteıik, kezdesýge kelgen oqýshylar – telejýrnalıst Argentına Jánibektiń medıa ortalyǵynyń tálimgerleri.
Aıan Ábdýálı,
«Egemen Qazaqstan»