Búgin Májilis Tóraǵasy Nurlan Nyǵmatýlın Reseıdiń Qazaqstandaǵy Tótenshe jáne О́kiletti elshisi Alekseı Borodavkındi qabyldady, dep habarlaıdy Májilistiń baspasóz qyzmeti.
Taraptar ekijaqty, sonyń ishinde, parlamentaralyq yntymaqtastyqty nyǵaıtýdyń ózekti suraqtaryn talqylady.
N.Nyǵmatýlın atap ótkendeı, Reseı Qazaqstannyń strategııalyq áriptesi, senimdi dosy jáne tatý kórshisi. О́tken jyly qos memleket arasynda dıplomatııalyq qatynastyń ornaǵanyna 25 jyl toldy.
Májilis Tóraǵasynyń pikirinshe, Qazaqstan men Reseı Prezıdentteriniń tereń túsinistik pen dostyqqa negizdelgen salıqaly saıasattarynyń arqasynda bizdiń elderimiz ózara áriptestiktiń joǵarǵy kórsetkishterine qol jetkizdi.
Mańyzdy baǵyttar qatarynda N.Nyǵmatýlın aımaqaralyq jáne shekaraaralyq yntymaqtastyqty, Eýrazııalyq keńistikte ıntegrasııalyq birlestikter aıasynda ózara is-qımyldy atady.
О́z kezeginde A.Borodavkın Qazaqstanmen dostyq qatynasty damytý zor mańyzǵa ıe ekenin alǵa tartyp, eki el arasyndaǵy aýqymdy jetistikterge toqtaldy. Eki eldiń Parlament ókilderi TMD PAA aıasynda ulttyq zańnamalardy úılestirý boıynsha tabysty eńbek etip, EýrAzEO zańnamalyq bazasyn qalyptastyrýda birlese belsendi jumys isteýde.
Májilis Tóraǵasy elshini jańa qyzmetke taǵaıyndalýymen quttyqtaı kelip, A. Borodavkınniń dıplomatııalyq jumystaǵy mol tájirıbesi bizdiń elderimiz arasyndaǵy baılanysty jan-jaqty tereńdetýge yqpal etetinine senim bildirdi.