Fransııa prezıdenti Emmanýel Makron Vashıngtonǵa resmı sapary barysynda AQSh Kongresinde sóz sóılep, Tramptan Iranmen ıadrolyq kelisimnen shyqpaýǵa kórdirýge tyrysty, dep habarlaıdy VVS.
AQSh zań shyǵarýshylaryna qarata aıtqan sózinde Makron AQSh pen Fransııa arasyndaǵy dostyq qarym-qatynas týraly aıtyp, kóptegen shaıqastarda eki eldiń qoıan-qoltyq áreket etkenin eske aldy. Sonymen qatar AQSh pen Fransııanyń adam quqyǵyn qorǵaý, bostandyq, genderlik teńdik sekildi máselelerge kózqarasy birdeı ekenin aıtty.
Iran ıadrolyq baǵdarlamasy týraly aıta kele Makron Irannyń ıadrolyq qarýǵa ıelik etýine eshqashan jol bermeý kerektigin qadap aıtty. AQSh prezıdentiniń Iran ıadrolyq kelisimine teris kózqarasta ekenin bile tura Makron "Biz turaqtylyqty qamtamasyz etýimiz kerek", dedi.
Kelisimdi saqtap qalýǵa nıetti Makron óz kezinde Fransııanyń qujatqa qol qoıǵanyn eske aldy.
Buǵyn deıin Donald Tramp Aq úıde Fransııa prezıdentin qabyldap, eki el Iran ıadrolyq kelisimne qatysty ortaq sheshimge kelý kerektigin aıtqan bolatyn. Tramp Iran ıadrolyq baǵdarlamasyn toqtatý arqyly sanksııalardy azaıtý kelisimine qatysty synı pikir bildirip, bul kelisimniń Tegerannyń zymyran baǵdarlamasyna qatysty emes ekenin, bul áreket óńirdegi máseleni sheshpeıtinin aıtty. Al Makron Trampty 2015 jyly AQSh, Ulybrıtanııa, Germanııa, Qytaı, Reseı, Fransııa qol qoıǵan kelisimnen shyqpaýǵa kóndirmek.
Sonymen qatar Emmanýel Makron Kongreste sóılegen sózinde AQSh-tyń Parıj kelisimine qaıta oralatynyna senimdilik bildirdi. "Biz moıyndaý kerek bir fakt bar - bizde planeta bireý ǵana. Bizge birge jumys istep, planetamyzdy uly etý úshin kóp kúsh jumsaý kerek. Jańa jumys oryndaryn qursaq ta, Jerdi saqtap qalýymyz kerek. Men AQSh-tyń Parıj kelisimine qaıta qosylatynyna senimdimin", dedi ol.
Bul sózderdi AQSh Kongresindegiler zor qoshemetpen qabyldady. Ásirese Tramptyń pozısııasyn qoldamaıtyn demokrattar erekshe qýanǵanyn jetkizdi.