25 sáýir kúni Almatydaǵy «Dostyq» sport kesheninde Qazaqstan Respýblıkasynyń basketboldan ulttyq stýdenttik lıgasynyń fınaly ótti. Aqtyq kezeńde erler arasynda H. Dosmuhamedov atyndaǵy Atyraý memlekettik Ýnıversıtetiniń stýdentteri úzdik atansa, al qyzdar arasynda Qazaq memlekettik qyzdar pedagogıka ýnıversıtetiniń toby jeńiske jetti.
Qazaqstanda alǵash ret QR Basketboldan ulttyq stýdenttik lıgasy, «Jas Otan» Jastar qanaty jáne QR Ulttyq Basketbol Federasııasynyń qoldaýymen ótken chempıonat eki kezeńnen turdy. Alǵashqy kezeńde 2017 jyldyń qazan aıynan bastap aımaqtar boıynsha «Ortalyq», «Almaty», «Ońtústik», «Soltústik», «Shyǵys», «Batys» dıvızıondary qurylyp, 30-dan astam stýdenttik top jarysqa tústi. Nátıjesinde, Almaty qalasyndaǵy fınalǵa 16 erler jáne 8 qyzdar toby ótti.
«Jas Otan» Jastar qanaty Tóraǵasy Danııar Súndetbaev «Chempıonat stýdentter arasynda úlken básekelestik týdyrdy. Chempıonattyń qazaq basketboly tarıhynda stýdentter arasynda alǵash ret ótkenin atap aıtý kerek. Joǵary oqý oryndarynyń stýdentteri óz komandalaryna keremet qoldaý kórsetti. Stýdentter lıgasy basketbol sport túriniń elimizde, ásirese jastar arasynda keńinen tanylýyna yqpal etedi», dedi.
Chempıonatty ótkizýdegi maqsat – jastar arasynda salaýatty ómir saltyn ustanýdy dáripteý, elimizde basketbol oıynyn keńinen taratý jáne joǵary oqý oryndarynyń toptaryna qoldaý kórsetý. Sheshýshi kezeńde úzdik oıyn kórsetken top mamyr aıynda Máskeýde ótetin ISBC Halyqaralyq Kýbogyna qatysady. Elimizdiń stýdentteri basketboldan halyqaralyq týrnırde alǵash ret baq synamaq. Álemniń 12 elinen kelgen eń úzdik oıynshylarmen jarysqa túsedi. Týrnırge jaqyn jáne alys shetelderden Reseı, Ispanııa, Serbııa, Latvııa jáne Gresııa quramalary qatysady.