Qazaq memlekettik qyzdar pedagogıkalyq ýnıversıtetinde Qazaqstan jas ǵalym-pedagogtarynyń birinshi respýblıkalyq Sleti ótti, dep habarlaıdy oqý ornynyń Baspasóz ortalyǵy.
Tuńǵysh ret uıymdastyrylǵan sharaǵa Qazaqstan Respýblıkasynyń Bilim jáne ǵylym vıse-mınıstri Bıbigúl Asylova, otandyq joǵary oqý oryndarynyń rektorlary men memleket jáne qoǵam qaıratkerleri, jas ǵalymdar qatysty.
Qazaqstan jas ǵalym-pedagogtarynyń birinshi respýblıkalyq Sletiniń ashylý saltanatynda Bilim jáne ǵylym vıse-mınıstri Bıbigúl Asylova mınıstr Erlan Saǵadıevtiń quttyqtaý hatyn oqyp berdi.
– Qymbatty elimizdiń jas ǵalym-pedagogtary, birinshi Respýblıkalyq Slettiń qonaqtary! Sizderdi Qazaqstan Respýblıkasy Bilim jáne ǵylym mınıstrliginiń atynan jáne óz atymnan Qazaqstan jas ǵalym-pedagogtarynyń birinshi respýblıkalyq Sletiniń ashylý saltanatymen shyn júrekten quttyqtaımyn. Búgin ǵylym men bilim salasyndaǵy tarıhı kún. О́ıtkeni elimizdiń jas ǵalym-pedagogtarynyń tyń ıdeıalary men jańasha oı-pikirlerin bólisýi úshin alǵash ret ózara dıalog alańy qurylýda. Tuńǵysh ret elimizdiń beldi jas ǵalym-pedagogtary birigýde. Sondyqtan bul mańyzdy da aýqymdy kezdesý bolmaq. Qazirgi tańda bilim men ǵylymnyń qarqyndy ózgerý zamanynda elimizdegi jastardyń ǵylymı áleýetin arttyrý – básekege qabiletti elder qataryna aparar basty baspaldaq. Olaı bolsa búgingi Slettiń basty maqsaty da – memleket pen qoǵam damýyna belsendi qyzmet etetin, jańasha turǵydan oılaıtyn jas pedagog-ǵalymdardy biriktirý bolyp tabylady, – delingen quttyqtaý hatta.
Basqosý barysynda Qazaqstan jas pedagog-ǵalymdarynyń Qaýymdastyǵy quryldy. Qaýymdastyqty qurý 2018 jylǵy 10 qańtaryndaǵy Qazaqstan Respýblıkasynyń Prezıdenti Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty halyqqa arnaǵan Joldaýy negizinde jasaldy. Qaýymdastyqtyń quryltaıshysy – Qazaq memlekettik qyzdar pedagogıkalyq ýnıversıteti.
– Qaýymdastyqty qurýdaǵy basty maqsat – memleket pen qoǵam damýyna belsendi qyzmet etetin, jańasha turǵyda oılaı alatyn jas pedagog-ǵalymdardy biriktirý, olardyń dıalog alańyn qurý. Sonymen qatar, bilim men ǵylym salasyndaǵy ózekti máseleler boıynsha jas pedagogtardyń júıelengen pikirlerin múddeli taraptarǵa jetkizý, oqytý men tárbıeleýdiń tıimdi tehnologııalarymen almasý, ǵylymı-zertteýler júrgizý jáne sheteldik joǵary oqý oryndary, kolledj, mektepterdiń jas pedagog-ǵalymdar Halyqaralyq Qaýymdastyqtar, odaqtar, keńestermen baılanys ornatý da qarastyrylǵan, – deıdi Qyzdar Ýnıversıtetiniń rektory Gaýhar Aldambergenova.
Qaýymdastyqqa múshe retinde 35 jasqa deıingi joǵary bilim berý júıesinde qyzmet etetin, pedagogıka salasynda ǵylymı zertteý tájirıbesi bar oqytýshylar tirkele alady.
Sonymen qatar, shara barysynda Latyn álipbıin úıretý ortalyǵynda sheberlik klasy, «Aqtumar» murajaıy: tarıh betterinen» taqyrybyndaǵy kórme jáne «Kórkem galereıa: oqytýdaǵy shabyt» atty keskindeme jáne gobelen boıynsha sheberlik klasyn ótkizildi. Sondaı-aq, Keshendi hımııa-bıologııa ǵylymı zertteý ortalyǵy, «Jańartylǵan energııa kózderi» zerthanasy men Psıhologııa-pedagogıkalyq túzetý kabınetinde Qyzdar Ýnıversıtetiniń ǵylymı zertteý jobalary kópshilik nazaryna usynyldy. Oqý ornynyń jas ǵalymdarynyń Fızıka, IT, Geografııa, Fılologııa, Horeografııa salalary boıynsha sheberlik klastary da uıymdastyryldy.