QHA Keńe­siniń keńeı­tilgen otyrysy ótti

G.Ábdiqalyqova Memleket bas­shysynyń «Qazirgi zama­naýı jahandyq jaǵdaıda ulttyq bir­­lik degenimiz – áleýmettik birlik, al qalyptasqan memleket degenimiz – áleýmettik mem­leket», degen sózderin atap ótti.

«Prezıdenttiń bes áleýmet­tik bastamasy» qoǵamdy keshendi túrde áleýmettik jańǵyrtýdyń draıverine aınalýǵa tıis. Olar saıası, ekonomıkalyq jáne rýhanı salalardaǵy aýqymdy reformalar algorıtmin jalǵastyra otyryp, túıindeıtin bolady. Áleýmettik birlikti tuǵyr etken ulttyq biregeılikti nyǵaıtý máseleleri árdaıym Qazaqstan halqy Assambleıasynyń basty nazarynda bolýǵa tıis», dedi Memlekettik hatshy.

G.Ábdiqalyqova keltirgen derekterge súıensek, 2017 jy­ly QHA qoǵamdyq sanany jań­ǵyrtý jobalary boıynsha 20 res­pýblıkalyq jáne 395 óńirlik is-shara uıymdastyrǵan. Eki myń­nan astam qaıyrymdylyq is-shara ótkizilip, kóp balaly jáne tabysy tómen 60 myńǵa jýyq otbasyna, 8 myńǵa jýyq túrli uıymdarǵa kómek kórsetilgen.

«Táýelsizdik alǵaly beri adam kapıtalyn damytýǵa qolaıly jaǵ­daı jasaý memlekettiń ne­giz­gi strategııalyq mindeti bolyp sanalady. Osy ýaqyt ara­lyǵynda kóptegen jumystar atqa­ryldy. Elbasynyń «Tór­tin­shi ónerkásiptik revolıýsııa jaǵdaıyndaǵy damýdyń jańa múmkindikteri» atty bıyl­ǵy Joldaýynda halyqtyń tur­my­syn jaqsartýǵa arnalǵan on naq­ty mindet aıqyndaldy», dedi G.Ábdiqalyqova.

Memlekettik hatshy Qazaq­stan eki márte jahandyq daǵda­rysty bastan ótkergenine qara­ma­stan, bıýdjettik saladaǵy qyz­metkerlerdiń jalaqysy turaq­ty tólenip otyrǵanyn atap ótti. Onyń sózine qaraǵanda, 2007 jyldan beri áleýmettik sala­ǵa bólingen qarjy bes esege ulǵaıǵan.

Sonymen qatar G.Ábdiqaly­qova QHA-nyń «Rýhanı jańǵy­rý» baǵdarlama­syn júzege asyrý­da­ǵy róline toqtaldy. Mem­lekettik hatshynyń keltirgen derek­terine súıensek, byltyr elimizde Assambleıanyń qol­­daýymen kóptegen sharalar ótken. Sondaı-aq QHA-nyń «Qa­zaqstannyń 100 jańa esimi» jobasyna da belsendi qatys­qanyn atap ótti.

«Almaty oblystyq QHA «Rý­hanı jańǵyrý» jobasy aıa­synda I.Jansúgirov atyn­daǵy Jetisý memlekettik ýnıver­sıtetimen birge «Rýhy bekem, kıeli meken – Jetisý» atty ǵylymı-tanymdyq ekspedısııa uıymdastyrdy. Nátıjesinde kıeli mekenderge barý baǵdary quryldy. Týrıstik baǵdarlar boıynsha skretch-karta ázirlenip, 255 navıgasııalyq baǵyttama ornatyldy. Bul QHA-nyń «Kıeli Qazaqstan» jobasyna qosqan shynaıy úlesi», dedi Memlekettik hat­shy.

Otyrys barysynda G.Ábdiqa­lyqova qurmetti ataqqa ıe bol­ǵan reseılik kórnekti saıası jáne qoǵam qaıratkeri Rýslan Aýshevti, Germanııanyń memleket jáne qoǵam qaıratkeri Genrıh Sertıkti quttyqtap, olarǵa QHA Dostyq elshisiniń patentin tapsyrdy.

Abaı ASANKELDIULY,

Sýretti túsirgen Orynbaı BALMURAT,

«Egemen Qazaqstan»