Taraz qalasynda Jambyl oblystyq mádenıet, arhıvter jáne qujattama basqarmasynyń uıymdastyrýymen alǵash ret «Kóne Taraz jańǵyryǵy. Eýrazııanyń mádenı kópirleri» atty Qazaqstan-Italııa sheberleriniń kórmesi ótti.
Halyqaralyq kórmege ıtalııandyq shyny árleýshi Djordjıo Spessamontı, sýretshi Svetlana Kosta, ıtalıandyq sýretshilerdiń Qazaqstandaǵy resmı ókili Quralaı Sqaqova jáne «Asyl-Dızaın» sán úıiniń bas dızaıneri Aıdarhan Qalıev qatysty.
Atalǵan kórmeni Jambyl oblysy ákimi apparatynyń basshysy Nurjan Kalenderov sóz sóılep ashyp, Qazaqstan men Italııa sheberlerin mádenıet pen óner arqyly biriktirip, tyǵyz yntymaqtastyqtyń jemisi retinde uıymdastyrylyp otyrǵan sharanyń mańyzyna toqtaldy. Budan soń sheteldik qonaqtarǵa qazaqy dástúr boıynsha syı-sııapattar tabystaldy. О́z kezeginde ıtalıalyq ataqty shyny árleýshi Djordjıo Spessamontı men sýretshi Svetlana Kosta sóz sóılep, kóne Taraz jerinde uıymdastyrylyp otyrǵan kórmege rızashylyǵyn bildirdi. Sonymen qatar Djordjıo Spessamontı venesııa shynysynan jasalǵan «Qyzǵaldaq» týyndysyn jáne Svetlana Kosta Astana qalasyn beınelegen kartınasyn Jambyl oblystyq tarıhı-ólketaný mýzeıine tartý etti. Kórme barysynda jerlesimiz, «Asyl-Dızaın» sán úıiniń bas dızaıneri jáne «Neo-folklor» stıliniń negizin salýshy Aıdarhan Qalıev kıim toptamalarynan defıle kórsetilimin kópshilikke usyndy.
Kórmege kelýshiler ıtalıandyq áıgili shyny jasaý sheberi Pıno Sınorettonyń, Amerıka mektebiniń ókili, shyny sheberi ári dızaıner Sheng Karına Sesılııanyń shyny buıymdarynan jasalǵan jádigerlerimen qosa, Djordjıo Spessamontıdiń venesııalyq shynydan jasalǵan, qazaqtyń ulttyq oıý-órnekterimen órnektelip, altynmen aptalǵan vazasy men qyzyl kamzol beınesimen kómkerilgen ári kúmispen kúptelgen ydystaryn, sondaı-aq álemge áıgili Astana qalasyn beınelegen Svetlana Kostanyń «Jańa qalanyń kún shýaǵy», «Túngi Astana ottary», «Álem qusy» týyndylaryn tamashalady. Kórme barysynda ıtalıandyq qonaqtarǵa kóne Taraz ólkesiniń tarıhı oryndary tanystyrylyp, Aısha bıbi, Babadja hatýn kesenelerine, «Kóne Taraz» ortalyǵyna jáne Jambyl oblystyq tarıhı-ólketaný mýzeıine ekskýrsııalar uıymdastyryldy.
Jalpy, «Kóne Taraz jańǵyryǵy. Eýrazııanyń mádenı kópirleri» atty halyqaralyq kórmeniń Taraz jerinde uıymdastyrylýy kezdeısoq emes. Taraz shaharynyń órleý kezeńi bolyp sanalatyn IH-H ǵasyrlarda munda shyny óndirisi erekshe qolǵa alynyp, kórkemdigi joǵary buıymdar Uly Jibek joly arqyly Shyǵys elderge jáne Eýropaǵa keńinen taraǵan. Sol sebepti ótken tarıhty qaıta jańǵyrtyp, Qazaqstan-Italııa arasyndaǵy sheberlik yntymaqtastyqty arttyrý maqsatynda ótken kórme ıtalıalyq sýretshilerge Taraz tarıhyn áıgiledi. Sonymen qatar, atalǵan kórme aldaǵy bir aı boıy Taraz turǵyndary men qonaqtary úshin qyzmet kórsetetin bolady.
Hamıt ESAMAN, «Egemen Qazaqstan»