Elbasy Nursultan Nazarbaev bıylǵy Joldaýynda bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyldyń 1 qańtarynan bastap 30 prosentke kóbeıtýdi tapsyrdy. Bul muǵalimder qaýymyn qýantqan jańalyq boldy.
Joldaý mindetteriniń biri – kategorııalar arasyndaǵy alshaqtyqty arttyryp, muǵalimder úshin biliktilik deńgeıin eskeretin kategorııalardyń jańa kestesin engizý. Prezıdent kategorııalardy álemde qoldanylyp júrgen ulttyq biliktilik test arqyly berý kerektigin aıtqan bolatyn. «Bul pedagogtardy ózderin udaıy jetildirýge yntalandyratyn bolady. Nátıjesinde, muǵalimderdiń jalaqysy biliktiliginiń rastalýyna baılanysty tutastaı alǵanda 30 prosentten 50 prosentke deıin ósedi. Bul úshin bıyl qosymsha 67 mıllıard teńge bólý qajet» delingen Joldaýda.
Bilim jáne ǵylym mınıstri Erlan Saǵadıev búginde 60 myń muǵalim atalǵan testileý attestasııasyna jazylǵanyn jetkizdi. Pedagog kadrlardyń biliktilik sanattaryn taǵaıyndaýdy eki kezeńde júrgizý josparlanýda. Birinshi kezeń – «Oqý pániniń mazmuny» jáne «Oqý ádistemesi men pedagogıka» modýlderi boıynsha 26 mamyrdan 5 maýsymǵa deıin jáne aǵymdaǵy jyldyń 1-10 qarashasynda júrgiziledi. Ondaǵy suraqtardyń 70%-y pándik bilimge jáne 30%-y pedagogıka men ádistemege baǵyttalǵan. Al ekinshi kezeń qyzmet nátıjeleriniń keshendi taldamalyq qorytyndysyna arnalady. Bul aǵymdaǵy jyldyń 31 shildesinen 15 jeltoqsanyna deıin atqarylmaq. Jańa júıe boıynsha attestattaýdan barlyq ótinish bildirýshi óte alady. Osy oraıda bas basylym Bilim jáne ǵylym mınıstrliginiń «Ulttyq testileý ortalyǵy» RMQK-men birge pedagog qyzmetkerlerge arnalǵan jańa formattaǵy ulttyq biliktilik testileýge daıarlyq jobasy aıasynda barlyq pán boıynsha suraqtardyń úlgisin jarııalaýdy bastaıdy.
Test suraqtarynyń alǵashqy bóligi gazettiń 10 mamyrdaǵy nómirinde jarııalanady