Soltústik Koreıa men Ońtústik Koreıa basshylary 16 mamyr kúni Phanmýndjomda joǵary deńgeıli kezdesý ótkizýdi josparlaǵan bolatyn. Alaıda kezdesýge az ýaqyt qalǵanda Phenıan kelissózderden bas tartty. Kezdesýde eki el basshylary sáýir aıynda kótergen máseleler jan-jaqty talqylanady dep kútilgen edi. Onyń ishinde Koreı túbeginiń ıadrosyz aımaqqa aınalyp, birigý máselesi de bar.
Soltústik Koreıa basshysy AQSh pen Ońtústik Koreıanyń áskerı oqý-jattyǵý jumystaryna daıyndyqtarynan soń kezdesýden bas tartty, sonymen qatar Amerıka prezıdenti Donald Tramptyń Phenıandy ıadrolyq qarýdan tolyǵymen bas tartýǵa kóndirý áreketterine narazy ekenin bildirdi. Soltústik Koreıanyń resmı agenttiginde KHDR-dyń syrtqy ister mınıstri orynbasarynyń málimdemesi jarııalandy. Onda «Eger AQSh bizden ıadrolyq qarýdan tolyǵymen bas tartýdy talap etýin qoımasa, biz sammıt týraly sheshimimizdi qaıta qarastyrýǵa májbúr bolamyz», delingen. Esterińizge sala ketsek, Soltústik Koreıa prezıdenti Kım Chen Yn men Donald Tramptyń kezdesýi Sıngapýrde 12 maýsymda ótedi dep josparlanyp otyr.
VVS AQSh elshiliginiń Ierýsalımge aýysýy qaqtyǵys týǵyzdyIerýsalımdegi AQSh elshiligi ashylǵan kúni Gaza sektorynda Izraıl áskerimen qaqtyǵysta kem degende 55 palestınalyq qaza taýyp, 2700 adam medısınalyq kómekke júgingen. Qaqtyǵys nátıjesinde Izraıl tarapynan jaraqat alǵandar tirkelmedi. Izraıldiń premer-mınıstri Bınıamın Netanıahý áskerılerdiń bul áreketke Gazany baqylap, Izraıldi talqandaǵysy keletin HAMAS radıkaldy tobynan qorǵaný úshin barǵanyn aıtty. Aq úı de qaqtyǵystarǵa HAMAS-ty aıyptap, zorlyq-zombylyqty palestınalyq toptyń bastaǵanyn málimdedi. Degenmen kóptegen álemdik kóshbasshylar Izraıl áskerılerin sherýshilerge qarý qoldanǵany úshin aıyptady. Al Izraıl qarýly kúshteriniń tóraǵasy qarý sherýshilerge emes, top ishindegi ekstremısterge qarsy qoldanylǵanyn aıtty.
Aıta ketý kerek, dúısenbi kúni Ierýsalımde Donald Tramptyń sheshimimen Tel-Avıvten kóshirilgen AQSh elshiliginiń ashylý saltanaty ótti. Biraq palestınalyqtar bul sheshimge qarsy ekendikterin kórsetti. Elshilik ashylǵan kúni Gaza sektorynda myńdaǵan palestınalyqtar sherýge shyqty.
THE VERGE
NASA Marsqa tikushaq ushyrýdy josparlaıdyNASA 2020 jyly Qyzyl planetany zertteý úshin Marsqa mını-tikushaq jiberýdi josparlap otyr. Halyqaralyq uıym sol arqyly ushatyn apparattyń atmosfera tyǵyzdyǵy Jerden júz ese tómen planetada usha alý múmkindigin tekserip kórmek.
Mars Helicopter atalyp ketken tikushaqty NASA-nyń Reaktıvti qozǵalys zerthanasy 4 jyldan beri jasap jatyr. Degenmen agenttik osy kúnge deıin Marsqa aparatty jiberý-jibermeý týraly bir sheshimge kele almaı júrgen edi. Eger tikushaq qyzyl planetada buzylmaı jumys istese, ǵalymdar Marstyń betki qabatynyń ǵana emes, osy kúnge deıin qoljetimsiz bolǵan jerlerdiń de sýretterin alatyn bolady.
Belgili bolǵandaı, apparatta 2 kamera bolady. Al tikushaq Mars atmosferasyna laıyqtalyp jasalyp jatyr. Mamandardyń aıtýynsha, kopterdiń Jerdegi ushý bıiktigi 12 200 metrdi quraıdy. Al onyń salmaǵy 1,8 kılo.
«Mars-2020» mıssııasy 2020 jyldyń shilde aıynda AQSh-tyń Florıda shtatyndaǵy Kanaveral kosmodromynan bastalady dep kútilýde. Al qyzyl planetaǵa mıssııa 2021 jyldyń aqpan aıynda jetedi degen boljam jasalǵan.
ELECTREK Ilon Mask Los-Andjelesti kólik keptelisinen qutqarmaqSpaceX jáne Tesla kompanııalarynyń negizin qalaǵan Ilon Mask Los-Andjelestegi jer asty týnnelin kórsetti. Mask týnneldi jasaǵan The Boring Company kompanııasy ony iske qosý úshin bıliktiń maquldaýyn kútip otyrǵanyn aıtty.
«Boring Company-diń Los-Andjelestegi alǵashqy týnneliniń qurylysy aıaqtalýǵa jaqyn. Bılik maquldaǵan soń biz birneshe aı boıy tegin qyzmet usynatyn bolamyz. Bul jobaǵa atsalysqandardyń barlyǵyna alǵys aıtamyn», dedi Ilon Mask. Onyń aıtýynsha, jańa týnneldi qoldaný úshin jaıaý júrginshilerge, velosıped pen qoǵamdyq kólikterge basymdyq beriletin bolady. Sonymen qatar Ilon Mask týnnel arqyly jol aqysy qalalyq avtobýstardan da tómen bolatynyn aıtty.
Daıyndaǵan Gúlnur QÝANYShBEKQYZY, «Egemen Qazaqstan»