«Petropavl-Qorǵan» baǵytyndaǵy shekaraaımaqtyq kúre joldy kúrdeli jóndeý jumystary byltyrdan beri qyzý óris alǵan.
Úsh jylǵa josparlanǵan aýqymdy sharaǵa respýblıkalyq qazynadan 27 mıllıard teńge qarastyrylyp, kelesi jyly paıdalanýǵa beriledi.
Bas merdiger «K-Dorstroı» AQ jergilikti fılıalynyń dırektory Iýrıı Ivashovtyń aıtýynsha joldyń eni 6-7 metrden 13 metrge deıin keńeıtilip, ústińgi qabatyna birneshe qalyńdyqta asfalt-beton jabyndysy tóseletin bolady. Bıyl jalpy uzyndyǵy 60 shaqyrym tasjoldyń jartysyna jýyǵyn qalpyna keltirý úshin 400 tehnıka birligi men 600 adam jumyldyrylǵan. Jergilikti qurylys materıaldary men ozyq tehnologııalar qoldanylýda. Avtomatty túrde jumys jasaıtyn qondyrǵylar shetelden ákelingen.
«Nurly jol» baǵdarlamasy sheńberinde júrgizilip jatqan jańǵyrtý jumystarynyń sapasyn «Sapa SZ» kásiporny qadaǵalaıdy. Byltyr 5 mıllırd teńge qarjy ıgerilse, jyl aıaǵyna deıin 11 mıllıard teńgeniń jumystary atqarylmaq.
«Budan tysqary 148 shaqyrym jolǵa ortasha jóndeý jumystary júrgiziledi. Petropavl, Býlaevo qalalaryna kire beris jerlerge energııa únemdeıtin shamdar ornatylady. 1468 shaqyrym jol respýblıkalyq mańyzǵa ıe bolsa, bıyl 209 shaqyrymy jóndeledi. Bul ótken jylǵa qaraǵanda 1,5 esege artyq», deıdi «Qazavtojol» UK AQ SQOF dırektorynyń orynbasary Ámir Kárimbaev.
О́mir Esqalı,
«Egemen Qazaqstan»