Abaı atyndaǵy Qazaq ulttyq pedagogıkalyq ýnıversıtetinde Qazaqstan halqy Assambleıasynyń kafedrasy ashyldy.
Kafedranyń ashylý saltanatyna QHA músheleri men etnomádenı ortalyqtardyń ókilderi, ýnıversıtet basshylyǵy jáne stýdentter qatysty. QHA Tóraǵasynyń orynbasary, Assambleıa hatshylyǵynyń meńgerýshisi L.A.Prokopenko quttyqtaý lebizin bildirip, kafedraǵa kitaptar toptamasyn syıǵa tartty. Abaı atyndaǵy QazUPÝ rektory T.O.Balyqbaev jáne Qazaqstan halqy Assambleıasy kafedralar qaýymdastyǵynyń prezıdenti A.A.Bashmakov ózara yntymaqtastyq jónindegi memorandýmǵa qol qoıdy.
Qol qoıylǵan negizgi qujat «Qazaqstan – 2050» strategııasy jáne Qazaqstan halqy Assambleıasynyń damý tujyrymdamasyn basshylyqqa ala otyryp, elimizde ultaralyq tatýlyqty, áleýmettik-saıası turaqtylyqty saqtaýǵa negizdelgen sharalardy júzege asyrý arqyly bilim, ǵylym, mádenıet jáne aqparattyq keńistiktegi ózara yqpaldastyqty damytýǵa baǵyttalǵan. Ǵylymı qaýymdastyq pen stýdent jastardy ultaralyq birlik pen qoǵamdyq kelisim úderisterine tolyqqandy qatysýǵa múmkindik týǵyza otyryp, azamattyq jáne mádenı kelisimderdiń tıimdi júzege asýyna yqpal etý bolyp tabylady.
Saltanatty shara «Bes áleýmettik bastama – áleýmettik birliktiń tuǵyry» taqyrybyndaǵy dóńgelek ústelde jalǵasyn tapty. Dóńgelek ústeldiń jumysyn ashyq dep jarııalaǵan Abaı atyndaǵy QazUPÝ rektory T.O.Balyqbaev Memleket basshysy N.Nazarbaevtyń syndarly saıasatynyń negizi - Qazaqstannyń damý bolashaǵy ultaralyq kelisim negizderinde jatqandyǵyn atap ótti. «Elbasy saıasatynyń arqasynda elimizdiń árbir azamaty úshin urpaqtar sabaqtastyǵy arqyly jetken tatýlyq, birlik, senim men teń quqylyq mańyzdy qasıetter bolyp tabylady. 1995 jyly Memleket basshysynyń jarlyǵymen qurylǵan Qazaqstan halqy Assambleıasy búginde el birliginiń altyn arqaýyna aınalyp otyr. Jıyrma jyldan astam ýaqyt ishinde Qazaqstan halqy Assambleıasynyń qoǵamdaǵy uıymdastyrýshylyq áleýeti tolysty. El dıplomatııasynyń mańyzdy bir bóligine aınaldy. Búginde Assambleıa ǵylymı usynystar men jastarǵa bilim berý máselesine erekshe kóńil bólip keledi. Elimizdiń bilim berý oryndarynda Assambleıanyń ǵylymı saraptamalyq keńesi, kafedralary jumys isteıdi. Abaı atyndaǵy QazUPÝ qabyrǵasynda taǵy bir kafedranyń ashylýy stýdentter arasynda tatýlyq pen birlikti, dostyqty nyǵaıtýǵa qyzmet etedi. Búginde ýnıversıtette otyz besten asa ult ókilderiniń balalary bilim alýda» dep atap ótken ýnıversıtet rektory kafedra meńgerýshiligine taǵaıyndalǵan tarıh ǵylymynyń doktory, professor G.V.Kanǵa quttyqtaý lebizin bildirdi.
Kelesi sóz kezegin alǵan QHA Tóraǵasynyń orynbasary, Assambleıa hatshylyǵynyń meńgerýshisi L.A.Prokopenko kafedranyń ashylýy on jyl aıasynda jumys istep kele jatqan QHA kafedralar qaýymdastyǵy úshin úlken jetistik dep atap ótti. Sebebi, osy kafedrada bilim alatyn bolashaq pedagogtar erteńgi kúni elimizdiń barlyq aımaqtaryna bilim berýge attana otyryp, el bolashaǵynyń, rýhanı jańǵyrýynyń bastamashysy bolady ári jańa kafedra QHA janyndaǵy «Jańǵyrý joly» jastar qozǵalysy jumysynyń jandanýyna yqpal etedi, dedi. Búginde bul qozǵalystyń aldynda rýhanı jańǵyrý baǵdarlamasyn júzege asyrý mindeti tur. Osy oraıda «Uly dala eli» sakraldy baǵdarlamasynyń alǵashqy kezeńi - «Qamqor» aksııasy 9 mamyrda ótse, 31 mamyrda «Taǵzym» aksııasy josparlanyp otyr. Al 14 maýsymda QHA elimizdiń sakraldy aımaqtarynda tanymdyq baǵdarlamalardy júzege asyryp, tarıhı-mádenı málimetterdi jınaýǵa yqpal etetin bolady.
Assambleıanyń aldynda turǵan negizgi mindet rýhanı jańǵyrý baǵdarlamasyn júzege asyrý ekendigine toqtalǵan QHA kafedralar qaýymdastyǵynyń prezıdenti A.A.Bashmakov búginde oqý oryndarynda jumys isteıtin QHA-nyń qyryqqa jaýyq kafedrasy elimizdegi ultaralyq tatýlyq pen birlikti nyǵaıtýǵa, Memleket basshysy alǵa qoıǵan mindetterdi júzege asyrýǵa qyzmet etedi, dedi.
Jańa ashylǵan kafedranyń meńgerýshisi G.V.Kan barlyq etnıkalyq ókildikter úshin esigimiz árqashan ashyq, dedi. Elimiz ǵylymy men bilimi damýy jolynda atqaratyn mindetter aýqymdy. Sondyqtan da bolashaqtaǵy yqpaldastyq el damýynyń jarqyn bolashaǵyna arnalady.
Kelesi kezekte quttyqtaý lebizderin bildirgen Túrik etnomádenı ortalyǵy tóraǵasynyń orynbasary Sh.A.Asıev, Evreı etnomádenı birlestiginiń tóraǵasy A.I.Baron, Uıǵyr mádenı ortalyǵynyń tóraǵasy A.B.Shardınov, «Memlekettik tilge qurmet» qoǵamdyq birlestiginiń tóraıymy A.Osman, «Barbang» kúrd mádenı birlestiginiń tóraǵasy K.I.Mırzoev, stýdenttik «Birlik» Assambleıasynyń múshesi E.Kýchýmıdze el birliginiń negizi tatýlyqta deı kele, qazaq halqyna qurmetterin bildirip, týǵan elimizdi birlese qasterleýge tıispiz dep atap ótti.
Elvıra SERIKQYZY,
«Egemen Qazaqstan»
ALMATY