Oral qalasyndaǵy Nazarbaev Zııatkerlik mektebinde sońǵy qońyraý saltanaty ótti. Bul mektep bıyl 12-jyldyq bilim berý júıesi baǵdarlamasyn tolyq aıaqtaǵan alǵashqy túlekterin ushyryp otyr.
Mektep dırektory Tımýr Nurkeshovtiń aıtýynsha, mekteptiń bıylǵy 85 túleginiń 14-i alys-jaqyn sheteldik ýnıversıtetter grantyn ıelengen. Mysaly, Ázız Talapov Máskeýde ótken «Arhımed» ónertabystar men ınnovasııalyq tehnologııalar salonyna eki márte qatysyp, júlde atanyp, «Arhımed» medalimen marapattalǵan. 8-synyp oqýshylary Bekbol Bolatov men Dastan Tynyshtyq Qaraǵandy qalasynda ótken «Roboland-2018» halyqaralyq baıqaýynan 3-oryn, Elamır Qadyrǵalıev Almatyda ótken «Infomatrıks» halyqaralyq saıysynan 2-oryndy ıelenipti. 11-synyp oqýshysy Danııar Arystanov respýblıkalyq pán olımpıadasynda orys tili men ádebıeti boıynsha 1-oryn, 11-synyp oqýshysy Varvara Kachalo qazaq tili páni boıynsha respýblıkalyq «Jarqyn bolashaq» olımpıadasynan 3-oryn, Zarına Abdýllıeva respýblıkalyq «Naýryz kezdesýleri-2018» ǵylymı jobalar saıysynan 3-oryn alǵan.
- Bıyl Nazarbaev zııatkerlik mektepteriniń qurylǵanyna - 10 jyl. Iаǵnı, 10 jyl buryn Astanada jańashyl formatta bilim beretin mektep óz jumysyn bastady. Elbasy bunymen toqtamaı, elimizdiń barlyq óńirinde osyndaı bilim ordasyn ashýdy qolǵa aldy. Nátıjesinde 2012 jyly Oral qalasynda da záýlim mektep esigin ashty. Sizder - eń baqytty urpaqsyzdar. Qazir Nazarbaev mektepteriniń tájirıbesin ózge de mektepterge qoldanyp jatyrmyz. Ásirese, aýyldyq mektepterge asa kóńil bólýdemiz. О́ıtkeni dala men qalanyń alshaqtyǵyn azaıtýymyz qajet. «Rýhanı jańǵyrýda» tabysty bolýdiń eń basty kilti bilim ekeni aıtylady. Bul úshin elimizde barlyq jaǵdaı jasalýda. Sizder sol úmitti aqtap, aldaryńyzǵa bıik meje qoıa bilińizder. Bilim jolynda qanattaryńyz talmasyn. Aq jol! - dedi sońǵy qońyraý saltanatyna arnaıy qatysqan Batys Qazaqstan oblysy ákimi Altaı Kólginov.
Búgingi shara aıasynda osy oqý jylynda mekteptiń «Úzdik oqýshysy» atanǵan respýblıkalyq «Nurintech» ınnovasııalyq jobalar baıqaýynyń, halyqaralyq «Arhımed» ónertabystar men ınnovasııalyq tehnologııalar Salonynyń júldegeri 11-synyp oqýshysy Ázız Talapovqa arnaıy sertıfıkat pen syılyq tabystaldy. Sondaı-aq «Jyldyń úzdik shańyraǵy», «Úzdik oqyrman», «Úzdik ýıkıpedııashy», «Úzdik TEDx spıkeri» marapattaldy. Úzdik oqýshylarǵa «Týǵan elge taǵzym» ólketaný-zertteý ekspedısııasynyń joldamasymen Shymkent qalasyna joldama berildi.
- «Nazarbaev zııatkerlik mektepteri» derbes bilim berý uıymynyń onjyldyǵy qarsańynda «Qoldaıyq aýyl mektebin» aksııasy ótedi. Elimizdegi 20 zııatkerlik mektep óz óńirindegi bir aýyldyq mektepke materıaldyq jáne ádistemelik kómek kórsetedi. Biz 28 mamyr kúni Bórli aýdanyndaǵy Keńtúbek aýyldyq orta mektebine baryp, Nazarbaev zııatkerlik mektebi júıesiniń ozyq oqý baǵdarlamasymen tanystyramyz, naqty áriptestik qoldaý-kómek kórsetemiz, - deıdi mekteptiń baspasóz hatshysy Aqmonshaq Jumaev.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Temirbolat TOQMÁMBETOV