Japonııanyń Qazaqstandaǵy «Shóp tamyry» áleýmettik jobasyna oraı Semeıdegi eskirgen mektepterdiń esik-terezelerin jóndeýge Kúnshyǵys eli belsene atsalysýda. Shatyrlary jabylyp, terezeleri jóndelip, taǵy basqa kerek-jaraqtary qamtylǵan mektepterdiń syrtqy kelbeti qalaı ózgergendigin kózben kórý úshin Qazaqstandaǵy Japonııanyń Tótenshe jáne ókiletti elshisi Itıro Kavabato myrza Semeıge arnaıy keldi.
– «Shóp tamyry» jobasyn qolǵa alǵannan beri Shyǵys Qazaqstan oblysynda 22 jobany júzege asyrdyq. Onyń jalpy quny 1 mln 400 myń AQSh dollary turady, – dedi elshi Itıro Kavabato myrza. Osy qarjynyń qomaqty bóligi Semeı mektepteriniń terezelerin jóndeýge, ıaǵnı zamanaýı plastık terezelerge aýystyrýǵa jumsaldy. Biz osy «Shóp tamyry» jobasy arqyly áleýmettik, medısınalyq, bilim berý mekemelerine kómek kórsetemiz. Qazirgi ýaqytta Semeıde 8 mektep jóndeldi.
Qonaqtar úshin Semeıdegi Prıgorod mektebi, №29 mektep sııaqty bilim oshaqtary arnaıy baǵdarlama ázirlep kórsetti. Olar elshini óz jetistikterimen tanystyrdy.
– Bizdiń qala bıýdjetine Japonııa eliniń qarjysy birshama kómek bolyp otyr, – dedi Semeı qalalyq bilim bóliminiń basshysy Natalııa Fesenko. Máselen, bir mekteptiń terezesin aýystyrý 20 mln teńgeden asyp jyǵylady. 2018 jyly qala bıýdjetinen №21 mekteptiń terezelerin jańalaýǵa ǵana qarjy berilgendikten, qalǵan mektepterdi jóndeýge bizge Kúnshyǵys eliniń paıdasy tıdi.
Raýshan NUǴMANBEK,
jýrnalıst
SEMEI