Búgingi tańda «Nurly jer» memlekettik baǵdarlamasy halyqty baspanamen qamtamasyz etý isin ilgeriletýge oń yqpalyn tıgizýde.
Qolǵa alynǵan baǵdarlama el ıgiligine qyzmet etip, ásirese jas otbasylardyń páterli bolýyna múmkindik usynýda. Myńdaǵan turǵynnyń basty máselesin sheshýge yqpal etip otyrǵan aýqymdy joba 2015-2019 jyldar aralyǵynda júzege asyrylýy josparlanǵan ınfraqurylymdy damytýǵa arnalǵan.
Elimiz egemendik alǵaly bergi ýaqyttyń ishinde qol jetken jetistikterimiz ben tolaıym tabystarymyz barshylyq. Árbir azamattyń táýelsiz elimizdiń eńse tiktep, básekege qabiletti bolýy jolynda eńbek etýi úshin onyń áleýmettik jaǵdaıynyń oń sheshimin tapqany durys-aq. Búgingi tańda memlekettiń qoldaýy nátıjesinde baspanaly bolyp, qonys toıyn toılap jatqan otbasylar sany artyp keledi. Sońǵy jyldary elimiz boıynsha jyl saıyn 40 myń páter salynǵan bolsa, endigi jerde «Nurly jer» baǵdarlamasy aıasynda jyl saıyn 100 myń páter paıdalanýǵa beriledi dep josparlanǵan. Bul rette taǵy da mıllıondaǵan azamattyń páterli bolýyna jaǵdaı jasalady.
«Nurly jer» baǵdarlamasynyń óńirler úshin de tıimdiligi joǵary. Búgingi tańda atalǵan baǵdarlama aıasynda oblıgasııalyq qundy qaǵazdar shyǵarý arqyly Taraz qalasyndaǵy 43,8 myń sharshy metrlik aýmaqta 80 páterli 10 turǵyn úıdiń qurylys jumystary júrgizilip keledi. Jambyl oblystyq qurylys, jolaý- shylar kóligi jáne avtomobıl joldary basqarmasynyń málimetinshe, bul maqsatqa ótken jyly 1,8 mıllıard teńge bólinip, qarajat tolyǵymen ıgerilgen. Sonymen qatar byltyrǵy jyldan ótpeli jáne bıylǵy turǵyn úı qurylysy jumystaryna barlyǵy 3,23 mıllıard teńge bólingen. Negizinen qurylys jumystarynyń deni qaladaǵy Y.Súleımenov kóshesiniń sońyndaǵy jer telimderinde júrgizilýde. Atalǵan basqarmanyń basshysy Ádilet Ahataevtyń aıtýynsha, halyqtyń az qamtylǵan toptary úshin satyp alý quqyǵynsyz «Araı» alqaby men «Báıterek» shaǵyn aýdanynan boı kóteretin turǵyn úı kesheni beriledi. Atalǵan 3 nysannyń qurylysyna respýblıkalyq bıýdjetten 1 531,302 mıllıon teńge bólingen. Bul nysandar bıyl paıdalanýǵa berilmek.
«Osy rette «Nurly jer» baǵdarlamasy aıasynda T.Rysqulov aýdany, Qulan aýylyndaǵy – «Araı», Taraz qalasyndaǵy – «Baryshan», Y.Súleımenov kóshesiniń sońyndaǵy turǵyn alqaptary men «Báıterek» shaǵyn aýdanynyń birqatar jer telimderiniń ınjenerlik-kommýnıkasııalyq ınfraqurylymdaryn damytýǵa respýblıkalyq bıýdjet esebinen tıisinshe qarjy bólingenin atap ótken jón», deıdi basqarma basshysy.
Búgingi tańda 2005-2006 jyldary kezekke tirkelgen tarazdyq turǵyndar arasynan 565 adam qanatqaqty jobaǵa qatysýǵa sheshim qabyldapty. Olar ótinishterin Taraz qalalyq ákimdigine joldaǵan. Al aǵymdaǵy jyldyń ekinshi toqsanynda «Nurly jer» turǵyn úı baǵdarlamasynyń shartyna sáıkes 205 qatysýshy jańa baspanaǵa qol jetkizip, qonys toıyn toılaıtyn bolady.
Elimizde turatyn árbir azamattyń baspanaly bolýyna arnalǵan «Nurly jer» baǵdarlamasynyń jambyldyq jurtshylyqqa bereri kóp. О́tken jyly Astana kúni qarsańynda 800 otbasynyń páterli bolǵany el esinde. Bul kórsetkish aǵymdaǵy jyly da jalǵasyn taýyp, turǵyndar qýanyshyn eseleı bererine kúmán joq.
Hamıt ESAMAN,
«Egemen Qazaqstan»
Jambyl oblysy