EXPO qalashyǵyndaǵy páterlerdiń baǵasy anyqtaldy, - dep habarlaıdy "Báıterek development"AQ baspasóz qyzmeti.
"Báıterek development" AQ Astana qalasyndaǵy "EKSPO-2017" halyqaralyq mamandandyrylǵan kórmesi aýmaǵynda ornalasqan turǵyn úı keshenderindegi páterler men kólik turaǵy oryndarynyń qunyn táýelsiz konsaltıng kompanııasynyń kómegimen anyqtady.
"EKSPO-2017" aýmaǵyndaǵy turǵyn úı keshenderindegi sharshy metrdi ótkizý quny 399 900 teńgeni, bir kólik turaǵy ornynyń quny 699 000 teńgeni quraıdy. Bul obektiler ornalasqan jeriniń tıimdiligimen, qabattarynyń azdyǵymen, páterleriniń erogonomııalyq josparlanýymen erekshelenedi. Turǵyn úı oramynyń ishki aýmaǵy oqshaýlanǵan jáne qala turǵyny úshin jaıly bolady", - dep habarlady "Báıterek development" AQ Basqarma tóraǵasynyń orynbasary Asqarbek О́serbaev.
Kompanııa 2018 jyldyń 1 maýsymynan bastap bir, eki, úsh jáne tórt bólmeli páterlerdi satýǵa shyǵarady. "Satyp alý sharttaryna keletin bolsaq, áleýetti satyp alýshylarǵa qoıylatyn jalǵyz talap: jeke tulǵalar úshin - tólem qabilettiligi jáne Qazaqstan Respýblıkasynyń azamaty bolýy qajet, al zańdy tulǵalar úshin - Qazaqstan aýmaǵynda tirkelýi jáne qyzmetin júzege asyrýy shart", - dep qosty kompanııa ókili.
"EKSPO-2017" halyqaralyq kórmesi aýmaǵynda taza árlengen páterdi birneshe tásildermen: qolma-qol aqshasyz tóleý arqyly óz qarajattary esebinen nemese ekinshi deńgeıdegi bankter arqyly ıpotekaǵa, sondaı-aq "Qazaqstannyń turǵyn úı qurylys jınaq banki" AQ qaryzy esebinen satyp alýǵa bolady.
"Turǵyn úıdi jáne mashına oryndaryn satyp alýǵa ótinimder qabyldaý prosesi onyń aıqyndylyǵyn qamtamasyz etý maqsatynda "Digital Baiterek" platformasy arqyly onlaın rejımde júzege asyrylatyn bolady. "Báıterek development" AQ rıeltorlyq kompanııalarmen yntymaqtastyq jasamaıtynyna jáne portal arqyly ótinimderdi tirkeý jáne resimdeý úshin tólemaqy almaıtynyna áleýetti satyp alýshylardyń nazaryn aıryqsha aýdarǵymyz keledi", - dedi О́serbaev.
Sonymen qatar turǵyn úı kesheninde "shoý-rým" jumys isteıdi, munda áleýetti satyp alýshylar páterlerdiń josparlanýymen tanysady, qajetti keńes alady jáne jyljymaıtyn múlikti satyp alýǵa ótinim resimdeıdi.