Búgin Senatta ótken parlamenttik tyńdaý barysynda Aqparat jáne kommýnıkasııalar mınıstri Dáýren Abaev sıfrlandyrýdyń alǵashqy nátıjeleri týraly aıtty.
«Memleket basshysynyń tapsyrmasy boıynsha Aqparat jáne kommýnıkasııalar mınıstrligi «Sıfrlyq Qazaqstan» membaǵdarlamasyn ázirledi. Baǵdarlama bes negizgi baǵyttan turady: ekonmıka salalaryn sıfrlandyrý; sıfrlyq memleketke kóshý; sıfrlyq Jibek Jolyn júzege asyrý; adamı kapıtaldy damytý; ınnovasııalyq ekojúıeni qurý. Jalpy alǵanda, júzege asyrylatyn jobalardyń tolyq ekonomıkalyq áseri 2025 jyly 2 trln teńgege jýyq quraıdy degen boljam bar. Memlekettik baǵdarlamany iske asyrý maqsatynda QR Prezıdentiniń janynan Sıfrlandyrýdy engizý máselesi jónindegi komıssııa quryldy. Komıssııanyń alǵashqy otyrysynda baǵdarlamaǵa baılanysty memlekettik organdardyń úsh aıda atqarǵan jumysy qarastyryldy. Atap aıtqanda, baǵdarlamanyń júzege asýyn qadaǵalaý osy komıssııanyń quzyrynda», - dep toqtaldy mınıstr.
Sonymen qatar, sıfrlandyrý keńseleri de quryldy. Qazirgi ýaqytta mınıstrlikter men ákimdikterde jalpy sany 36 keńse ornalasqan. Osylarǵa uqsas keńseler kvazımemlekettik sektor kompanııalarynda da bar.
«Qazir biz atqarylǵan jumystardyń alǵashqy nátıjelerin kóre bastadyq. Mysaly, elektrondyq saýdany damytýǵa yntalandyratyn jáne elektrondyq saýda sýbektileriniń sanyn arttyratyn ózgertýler Salyq kodeksine engizildi. Otandyq aqparattyq tehnologııa salasyn damytý maqsatynda arnaıy jol kartasy bekitildi. Elimizdegi sıfrlandyrýdyń saraptamalyq baǵasyn berý usynystaryn ázirleý úshin halyqaralyq sarapshylar keńesi quryldy. Otandyq IT-naryqpen josparly jumys júrgiziledi. Ár toqsan saıyn IT-kompanııa ókilderimen kezdesýler ótip turady», -dep naqtylady Dáýren Abaev. Onyń sózine qaraǵanda, «Sıfrlyq Qazaqstan» membaǵdarlamasy boıynsha júzege asqan nátıjeler bar. Olar - elektrondyq kommersııa jáne qolma qol aqshasyz tólemder. «Qazposhta» AQ Astana men Almaty qalalarynda mamandandyrylǵan elektrondy kommersııa ortalyqtaryn ashýy. Bul - jetkizý merzimin qysqartý men taýarlardy jeńildetý qyzmetterin jetildirý arqyly ınternet saýdany damytýǵa yqpal etedi. Memlekettik qyzmetterdi elektrondyq formatqa aýystyrý aıasynda ákimshilik kedergiler men qaǵaz qujat aınalymyn joıýǵa kómektesetin tásilder qabyldandy. Budan bólek, mınıstr jyl sońyna deıin barlyq oblys ortalyqtarynda sıfrlyq halyqqa qyzmet kórsetý ortalyqtary ashý josparda bar ekenin jetkizdi.
«2018 jyldyń qańtar aıynan bastap Qazaqstanda elektrondy eńbek bırjasy ónerkásiptik qoldanysqa engizildi. Bul memlekettik sektor júıelerine kirý ruqsatyn ashýdyń kómegimen iske asqan alǵashqy joba. Qazir 38 myń jumys berýshi, 45 eńbekpen qamtý agenttikteri, 5 buqaralyq aqparat quraldary men 5 onlaın alań jumys istep tur. Eń bastysy, elektrondy bırja azamattardyń jumysqa ornalasý úrdisin jyldamdatady. Búginde elektrondy bırjada 32 myńnan astam bos jumys orny, 69 myńnan astam rezıýme bar, 75 myńǵa jýyq azamat turaqty jumysqa ornalasqan», - dep túıdi Abaev.