Almatydaǵy Qazaqstan jazýshylar kitaphanasynda «El-shejire» qoǵamdyq qory Almaty qalasy Ishki saıasat basqarmasymen birlese otyryp, «Astana – táýelsiz Qazaqstannyń sımvoly» atty dóńgelek ústel ótkizdi.
Qazaqstannyń qazirgi zamanǵa laıyq jańa astanasyn salý ıdeıasy Memleket basshysy Nursultan Nazarbaevqa tıesili ekeni málim. 1994 jyldyń 6 shildesinde Qazaqstan Respýblıkasy Joǵarǵy Keńesi elordany Almatydan Aqmolaǵa aýystyrý týraly sheshimdi qabyldady. Kóshý prosesi resmı túrde 1997 jylǵy 10 jeltoqsanda júzege asty. Al 1998 jylǵy 6 mamyrda Prezıdenttiń Jarlyǵymen Aqmolanyń ataýy Astana bolyp ózgertildi. Mine, sodan beri zýyldap 20 jyl ótti...
Qıyn-qystaý kezeńde Elbasynyń osyndaı batyl qadamǵa barýyna túrli faktorlardyń sebep bolǵany anyq. Eń bastysy ol Qazaqstannyń ekonomıkalyq jáne geosaıası múddesine baılanysty osyndaı sheshim qabyldady. Astana el aýmaǵy ortasynda ornalasyp, Eýropa men Azııany jalǵastyratyn altyn kópir bolyp tur. Alaıda sol kezdegi jáne qazirgi qalany esh salystyrýǵa bolmaıdy. Astanany elimizdiń astanasy etip qalyptastyrýǵa bir emes, birneshe jyldar ketti. Kóp qarjy quıylyp, kóp kúsh jumsaldy. Búginde Astana – jedel qarqynmen damyp kele jatqan zamanaýı qala. Búginde ony búkil álem moıyndap otyr. Astana – Eýrazııanyń dál kindiginde ornalasqan ásem shaharlardyń biri ári biregeıi.
Astananyń 20 jyldyq mereıtoıyna oraı Almatyda uıymdastyrylǵan dóńgelek ústelge Ulttyq memlekettik kitap palatasynyń dırektory Álibek Asqarov, Qazaqstannyń eńbek sińirgen qaıratkeri Asyly Osman, jýrnalıst-jazýshy Qanat Ábilqaıyr jáne qalada shoǵyrlanǵan túrli kolledj oqýshylary qatysty. Olar Astananyń ótken tarıhy, keshegisi men búgingisi jaıynda keńinen áńgime qozǵap, ásem shahardyń memleketimizdiń damýyna, ósip-órkendeýine qosqan úlesi jáne onda atqarylyp jatqan aýqymdy ister týraly baıandady.
Ǵalym SÚLEIMEN,
«Egemen Qazaqstan»
ALMATY