Osydan eki aı buryn shamasynda, naqtyraq aıtsaq, 15 sáýirde Rıdder qalasynda mas kúıinde kólik tizgindegen atalǵan shahar ákiminiń orynbasary Baýyrjan Qurmanbaev 19 jastaǵy Evgenıı Smolnıkovti qaǵyp, bozbala oqıǵa ornynda kóz jumǵan bolatyn. Keıin ákim orynbasarynyń janynda О́skemen qalasynyń ákimi Qýat Tumabaevtyń da bolǵany anyqtalǵan-dy. Bul oqıǵa qoǵamda úlken rezonnans týdyryp, kólik apatynan qaıtys bolǵan jigitiń ata-anasy men rıdderlik turǵyndar óz narazylyqtaryn bildirip, О́skemen ákiminiń qyzmetten ketýin talap etken-di. Qos sheneýnikke qatysty is jaqynda Memlekettik qyzmet isteri men sybaılas jemqorlyqqa qarsy is qımyl agenttiginiń Shyǵys Qazaqstan oblysy boıynsha departamentiniń ádep keńesinde qaralyp, Rıdder qalasy əkiminiń orynbasary B.Qurmanbaevty qyzmetinen bosatý, О́skemen qalasy əkimi Q.Tumabaevqa qyzmetine tolyq saı emes degen eskertý berý týraly sheshim shyǵarylǵan edi.
6 maýsymda Qýat Tumabaev Rıdderdegi jol-kólik apatyna baılanysty arnaıy málimdeme jasady. «Qurmetti óskemendikter, jýyqta bolǵan jol-kólik oqıǵasyna baılanysty kóptegen materıaldar jınaldy. Men jol apatyna kýá boldym, marqumnyń týystaryna shyn kóńilmen qaıǵyryp kóńil aıtamyn. Osyǵan baılanysty meniń aınalamda kóptegen qańqý sózder taraı bastady. Memlekettik qyzmette júrgendikten meniń is-áreketterim eń aldymen qoǵamdaǵy senimdi kúsheıtýge baǵyttalýy tıis. Sol sebepten men tergeý jumystary kezeńinde jalaqym saqtalmaıtyn eńbek demalysyna ketý týraly sheshimge keldim», dedi Q.Tumabaev.
Ázirge О́skemen qalasy ákiminiń mindetin qala ákiminiń orynbasary Olga Býlavkına atqaratyn bolady.
Azamat QASYM, «Egemen Qazaqstan»
О́SKEMEN