Almatydaǵy «Mega» saýda-oıyn-saýyq ortalyǵynda Aqparat jáne kommýnıkasııalar mınıstrligi, Almaty qalasynyń ákimdigi jáne Media School Kazmedia uıymdarynyń muryndyq bolýymen «Naǵyz batyrlardyń qupııalary» atty IV beıresmı konferensııa ótti.
Memleket basshysy Nursultan Nazarbaev byltyrǵy jyldyń sáýir aıynda jarııalaǵan «Bolashaqqa baǵdar: rýhanı jańǵyrý» atty maqalasynda kóptegen ózekti máselelerge toqtala kele, qoǵamdyq sanany jańǵyrtý maqsatynda Úkimetke naqty tapsyrmalar bergen edi. Sol maqalada kórsetilgen mańyzdy jobalardyń biri – «Qazaqstandaǵy 100 jańa esim». Aıtýly jobanyń máni men mańyzy jáne maqsat-múddesine toqtalǵan Elbasy «Jastar ómirge shynaıy kózben qarap, óz taǵdyrlaryna ózderi ıelik ete alatyn azamat bolyp qalyptasýy úshin olarǵa úlgi usynýymyz kerek», dep qadap aıtty.
Almatyda ótken osy kommýnıkatıvtik jáne motıvasııalyq is-sharaǵa «Qazaqstandaǵy 100 jańa esim» atty respýblıkalyq baıqaýynda jeńimpaz atanǵan bir top azamat qatysty. Olar – voleıboldan Qazaqstannyń paralımpıadalyq jastar quramasynyń kapıtany Serik Esmatov, jas ınnovator ári «MBionics» kompanııasynyń negizin qalaýshy Máýlen Bekturǵanov, kınorejısser jáne belsendi qoǵam qaıratkeri Ázız Zaırov, jańa tehnologııalardy engizý jumystarymen aınalysatyn daryndy ǵalym-hımık Dıas Tastanbekuly jáne júrektiń patologııasyn kórýge kómektesetin júrek aqaýlarynyń ýltradybystyq dıagnostıkasyn jasaıtyn sanaýly kardıohırýrgtiń biri Gúljan Sársenbaeva. Joǵaryda esimderi atalǵan azamattardyń barlyǵy da eshqandaı qıyndyqqa moıymaı, ómir jolynda kezdesken kedergilerdi buzyp-jaryp, kózdegen maqsattaryna qol jetkizgen jandar ekeni daýsyz.
– «Qazaqstandaǵy 100 jańa esim» – Elbasynyń «Bolashaqqa baǵdar: rýhanı jańǵyrý» aıasyndaǵy aýqymdy jobalardyń biri. Jobanyń basty maqsaty – táýelsizdik dáýirinde elimizdiń kórkeıýine úles qosqan, ultymyzdyń altyn qoryna enýge laıyqty jerlesterimizdi kópshilikke tanytý. Sonymen qatar qarapaıym halyq arasyndaǵy bilimi men eńbegi, izdenimpazdyǵy men tabandylyǵy, batyrlyǵy men qaısarlyǵynyń arqasynda tabysqa jetken tulǵalardy keńinen nasıhattaý. Máselen, túrli salada jemisti eńbek etip, tórtkúl dúnıege tanylǵan shet memleketterdiń azamattary bul kúnderi Qazaqstanǵa jıi at basyn burady. Olardyń árqaısysynyń esimin barlyǵymyz jatqa bilemiz. Al ondaı tulǵalar bizdiń elde de bar. Sol abzal azamattardyń ómiri men taǵdyryn, júrip ótken jolyn, baǵyndyrǵan belesterin, júzege asyrǵan ıgi isterin, kópshilikke tıgizgen shapaǵatyn nasıhattaýdy maqsat tutyp, osyndaı aýqymdy sharalardy jıi uıymdastyrýdy kózdep otyrmyz, – deıdi Aqparat jáne kommýnıkasııalar mınıstrligi Aqparat komıtetiniń qoǵammen baılanys jáne memlekettik organdardy úılestirý basqarmasynyń basshysy Baqnııaz Qarashına.
Rasynda da, ondaı tulǵalar Qazaqstanda da bar. Bir ǵana mysal, osy sharaǵa qatysqan 24 jastaǵy ınnovator Máýlen Bekturǵanov buryn qatardaǵy keńse jumysshylarynyń biri bolǵan. Keńsede osylaı tapjylmaı otyra bersem, ómirim eleýsiz ótedi dep oılaǵan ol táýekelge bel býdy. О́ziniń boıyndaǵy qarym-qabiletin paıdalanǵan jas maman jańashyldyqqa bet burdy. Atap aıtsaq, Qazaqstandaǵy tuńǵysh bıonıkalyq qol protezderin ázirlep, jasatty. Bul qural III-toptaǵy múgedekterge arnalǵan jáne olardyń ómir saltyn jaqsartady. Protez adam qolynyń fýnksıonalyn barynsha qaıtalaıdy jáne adam ımpýlsteri arqyly belsendiriledi. О́ziniń eńbegi arqyly Máýlen Qazaqstan ǵylymyna úlken serpilis ákeldi.
Al Serik Esmatov bolsa, apattyń saldarynan eki aıaǵynan birdeı aıyrylyp, múgedekter arbasyna tańyldy. 13 jastaǵy bala úshin bul aýyr soqqy boldy. Alaıda Serik taǵdyrǵa moıynsynǵan joq. Ol qıyndyqpen kúresip, óziniń armanyna qaraı bet aldy. Bul kúnderi qazaqtyń qaısar uly paralımpıadashylar dodasynda jeńimpaz atanyp qana qoımaı, respýblıkamyzdyń ár aýmaǵynda ótip jatqan qoǵamdyq jumystarǵa da belsene aralasady.
Ǵalym SÚLEIMEN, «Egemen Qazaqstan»
ALMATY