Arqa tórinde bas qalanyń 20 jyldyǵyna arnalǵan «SAMGAU» VI halyqaralyq teatr festıvali óz shymyldyǵyn túrdi. Aldaǵy bir apta boıy, maýsym aıynyń 10-y men 17-si aralyǵynda elorda teatrlarynyń sahnasynda elimizdiń jáne taıaý shetel óner ujymdarynyń úzdik qoıylymdary kórermen nazaryna usynylady.
Astana qalasy Mádenıet jáne sport basqarmasynyń uıymdastyrýymen ótkizilip kele jatqan aıtýly óner dýmanynyń basty maqsaty – teatr óneri salasynda yntymaqtastyqty nyǵaıtý.
– Samǵaý sóziniń maǵynasy óte keń. Búgingi óner dýmanynyń negizinde baılanystyrsaq, onda bul ataý – óner kóginde qalyqtaý, shabyttyń shyńynda júrý, árdaıym úzdik bolý degen mazmunǵa saıady. Osy jyldar ishinde festıval óziniń basty mindeti – elorda mádenıetin damytý jáne qazaqstandyq teatr ónerine degen qyzyǵýshylyqty arttyrý, sheteldik seriktestermen rýhanı-shyǵarmashylyq yntymaqtastyqty nyǵaıtý, gýmanıtarlyq baılanystardy keńeıtý syndy aldyna qoıǵan maqsattaryn abyroımen eńserip keledi. Búginde «SAMGAU» – otandyq jáne álemdik teatr óneri mamandarynyń shyǵarmashylyq pikir almasý alańy ǵana emes, sahna salasy qyzmetkerleri men astanalyq óner janashyrlary úshin ár jyl saıyn asyǵa kútetin súıikti óner merekesine de aınalyp úlgerdi. Sondyqtan festıvaldiń barlyq qatysýshylaryna sáttilik jáne jeńis tileımin, – dep óz quttyqtaýyn jetkizdi festıvaldiń saltanatty ashylý rásimine qatysqan Astana qalasy ákiminiń orynbasary Ermek Amanshaev.
Búginde elorda mádenıetiniń ajyramas bóligine aınalyp úlgergen «SAMGAU» halyqaralyq teatr festıvali osydan 6 jyl buryn Astananyń 15 jyldyq mereıtoıyna oraı, qala ákimdiginiń qoldaýymen ótkizilgen bolatyn. Bas shahar mádenı-rýhanı ómiriniń tynysymen tanystyrýdy maqsat tutqan óner dýmany 2012 jyly qala kúni qarsańynda tuńǵysh ret óz shymyldyǵyn túrdi. Sodan bergi 6 jyl ýaqyt aralyǵynda festıval aıasyn keńeıtip, mazmunyn baıytyp, búginde bas qalanyń basty mádenı oqıǵasyna aınaldy.
Bıyl festıvalǵa Serbııa, Qyrǵyzstan, О́zbekstan, Tatarstan, sonymen qatar Petropavl, О́skemen, Shymkent jáne Astana teatrlary – barlyǵy 12 óner ujymy qatysady. Sondaı-aq teatr súıer qaýym festıval baǵdarlamasy aıasynda Qazaq ulttyq óner ýnıversıteti stýdentteriniń «Qozy Kórpesh-Baıan sulý» jáne «REvolıýsıIа» atty qos birdeı ózindik jumysyn da tamashalaı alady.
Astana qalasynyń 20 jyldyǵyna arnalǵan «SAMGAU» VI halyqaralyq teatr festıvaliniń taǵy bir qýanyshty jańalyǵy – festıval osy jyldan bastap ataýy men formatyn ózgertti. Iаǵnı buǵan deıin «Sahnadan sálem!» atalyp kelgen óner dýmany bıyldan bastap «SAMGAU» ataýyn ıelendi. Sondaı-aq úzdik atanǵan qoıylymdarǵa arnaıy júlde qory taǵaıyndaldy. Festıvalǵa qatysyp, úzdik óner kórsetken ujymdar: «Úzdik spektakl», «Úzdik rejıssýra», «Úzdik er adam beınesi», «Úzdik áıel adam beınesi», «II plandaǵy er adam beınesi», «II plandaǵy áıel adam beınesi», «Úzdik sýretshi» atalymdarynda jáne KSRO halyq ártisi, Qazaqstannyń Halyq Qaharmany Á.Mámbetov atyndaǵy arnaıy syılyqpen marapattalatyn bolady.
Astana qalasy Jastar teatry usynǵan N.Gogoldiń «Revızor» tragıfarsymen (spektakldiń qoıýshy rejısseri – Qazaqstannyń eńbek sińirgen qaıratkeri Nurqanat Jaqypbaı) ashylǵan mádenı shara bir apta boıy Astana tórin teatr óneriniń dýmanyna bóleıtin bolady.
Nazerke JUMABAI, «Egemen Qazaqstan»