Aqtóbe oblysynyń ákimi Berdibek Saparbaev jumys saparymen Qarǵaly aýdanynda bolyp, aýyl sharýashylyǵyndaǵy ınnovasııalyq jobalardyń júzege asyrylý barysymen tanysty, áleýmettik-mádenı sala nysandaryna bardy.
Aýdanda sýarmaly eginshilikti damytýdyń belsendi sharalary júrgizilip jatyr. Bıyl Jeltaý aýyldyq okrýginde sýarmaly jerler alańyn 4445 gektarǵa deıin jetkizý kózdelip otyr. EQDB qarajatyna sýarý júıesi qalpyna keltirilip, sharýa qojalyqtary ıgerýleri tıis jańa zamanaýı kommýnıkasııalyq tehnologııalar júrgizilýde. Merdigerler 12 shaqyrym elektr jelisin tartyp, sý beretin 14 sorǵylaý beketin qondyrady. Barlyq jumysty kúzge qaraı aıaqtaý josparlanǵan.
Berdibek Saparbaev aýdandaǵy aýylsharýashylyǵy qurylymdary basshylarymen kezdesken kezinde sýarmaly eginshiliktiń erekshelikteri jaıynda eske saldy.
- Biz sizderdi barlyq maýsym boıy sýmen qamtamasyz etetin jáne astyq ónimdiligin 8 mlrd teńgege deıin ósirýge múmkindik beretin jobany júzege asyryp jatyrmyz. Sizder de óz taraptaryńyzdan astyq ónimdiligin qamtamasyz etýlerińiz qajet, áıtpese salǵan ınvestısııanyń tıimdiligi bolmaıdy, - dep atap ótti oblys ákimi.
Petropavl aýylynda óńir basshysyna akvapanıka ádisin paıdalana otyra kásipshilik balyqtardyń shabaqtaryn baǵýdyń qyzyq jobasy tanystyryldy. Jergilikti kásipker Artýr Kofler 4 myń tonna shabaqty ósirip, olardy endigi tabıǵı ortaǵa jiberip te qoıǵan.
Sh.Qaldyaıaqov atyndaǵy aýylda tamyz aıynda qýattylyǵy 5 myń tonna kartopqa deıin jetetin kókónis qoımasy paıdalanýǵa berilmek. «Aktep» JShS ony óz qajetilikterine jumsaıdy dep kózdelýde: kásiporyn kúzde 200 gektar alańnan 8 myń tonna astyq kútip otyr, bir bóligi «Tabys» bazarynda arzan baǵamen satylatyn bolady. Budan basqa, kásiporyn birneshe tuqym sharýashylyǵyn quryp, jergilikti sharýalardy sapaly tuqym materıaldarymen qamtamasyz etkisi keledi.
О́ńir basshysy «Aktep» JShS basshylyǵynyń qyzmetine oń baǵa berip, osyndaı kásiporyndardyń oblystaǵy aýylsharýashylyǵy salalaryn damytýdyń qolbasshysy bolyp tabylatynyn atap ótti.
Munda Berdibek Saparbaev «Týǵan jerge taǵzym» aksııasy aıasynda salynǵan «Qazposhta» bólimshesiniń jańa ǵımaratyn qarap shyǵyp, jergilikti turǵyndarmen kezdesti.
Oblys ákimi qarǵalylyqtardan memlekettiń aýylsharýashylyǵyn damytýǵa bergen múmkindikterin belsendirek paıdalanýlaryn surady, sonymen qatar, aýyldaǵy jekemenshik turǵyn úılerdiń qurylys qarqynyna kóńili tolmaıtynyn jetkizdi. Jer telimderine barlyq ınjenerlik kommýnıkasııalar tartylǵanymen jekemenshik - turǵyn úı qurylysy báseń.
Sondaı-aq óńir basshysy «Altyn bulaq» saýyqtyrý kesheniniń turǵyzylý barysymen tanysty, sonymen qatar, Badamsha aýylynda salynyp jatqan jaldamaly-kommýnaldy turǵyn úıdi, balabaqsha ǵımaraty men qalpyny keltirilip jatqan saıabaqty qarap shyqty.
Oblys əkiminiń jumys sapary "Baqytty bala" merekelik sharasymen aıaqtaldy. Oǵan aýdannyń 15 mektebinen kelgen 300-den asa bala qatysty.
Berdibek Saparbaev ata-ana qamqorynsyz qalǵan úsh balaǵa baspana alý úshin sertıfıkattar tabys etti. On jetim bala "Turǵyn úı-qurylys jınaq bankindegi" esepshotyn toltyrý úshin 100 myń teńgege sertıfıkat aldy.
Budan basqa, oqý jylynda erekshelengen 110 oqýshyǵa Astana qalasy men Túrkistannyń kıeli jerlerine saıahat jasaýǵa joldamalar berildi. Jıyrma qarǵalylyq bala demeýshiler qarajaty esebinen Orynbor oblysynyń Novotroısk qalasyndaǵy saýyqtyrý lagerine bara alady.
Temir QUSAIYN, «Egemen Qazaqstan»