Elbasy Ońtústik Qazaqstan oblysy turǵyndarynyń talap-tilegin eskerip, Maqtaaral, Saryaǵash aýdandaryn bólý jolymen tórt aýdan qurý týraly Jarlyqqa qol qoıdy. Bul tarıhı sheshim aýdandar turǵyndaryn erekshe qýanyshqa bólep, el erekshe rızashylyǵyn bildirýde. Halqy kóp, tyǵyz qonystanǵan, demografııalyq ósimi joǵary óńirde aýdandardyń qurylýy jergilikti ákimshilik-basqarý júıesiniń jumysyn damytyp, jańa jumys oryndarynyń ashylýyna mol múmkindikter bereri sózsiz.
Aýdandardyń áleýeti eskerilip, búginde jańa jobalar júzege asyrylýda. Mysaly, Saryaǵashta emdik-saýyqtyrý oryndaryn kóbeıtip, qyzmet kórsetý sapasy jaqsara túspek. Qazirgi tańda Saryaǵash aýdanynda 20 qonaq úı, 12 mádenı-tarıhı nysan, 1 balalar shıpajaıy men lageri jáne 26 emdik-saýyqtyrý ortalyǵy qyzmet kórsetedi. Bıylǵy jyldyń I toqsanynda aýdanda 2 shıpajaı iske qosylsa, jalpy 2018-2023 jyldar aralyǵynda 9 shıpajaı salý josparlanǵan. Aýdanǵa issapary barysynda Kókterek kentindegi shıpajaılar aýmaǵynda ornalasqan «Ásem-Aı» mıneraldy sýsyn óndiretin zaýyttyń jumysymen tanysqan oblys ákimi J.Túımebaev týrızmdi damytý úshin aýdannyń áleýeti jetetinin atap ótti. «Munda tórtkúl dúnıege belgili shıpaly sýy bar, ınfraqurylym máselesi sheshilgen. Árıne shıpajaılar sanynyń artqandyǵy kelýshilerdiń kóbeıgendigin kórsetedi. Máselen, búgingi tańda oblys boıynsha 190 qonaq úı, 44 shıpajaı, 61 demalys aımaǵy, 19 balalardy saýyqtyrý lageri jáne 104 týrıstik uıym bar. Bastysy, atalǵan oryndarda kelýshilerge joǵary qyzmet kórsetý sapasyn nazarda ustaý qajet», dedi J.Túımebaev.
«Ásem-Aı» mıneraldy sýsyn óndiretin kásiporyn saǵatyna 20 myń dana ónim óndiredi. 8 gektar aýmaqta ornalasqan zaýytta búginde 80-ge jýyq adam jumys isteıdi. Orta Azııadaǵy eń úlken demalys ornyna aınalý negizgi mindetteriniń biri sanalatyn Saryaǵashta jergilikti turǵyndardyń jaıly ómir súrýi de nazardan tys qalǵan emes. Osy oraıda, Qaplanbek oqý-tájirıbe sharýashylyǵy aýmaǵynda 585 páterli «Nurly jer» baǵdarlamasymen salynyp jatqan 13 turǵyn úıdiń qurylysy bastalǵan. Aýdan tarıhynda munshalyqty kólemde turǵyn úıler sońǵy 45 jylda salynbapty. Merdiger mekeme – «Yntymaq Bes-Arys» JShS. Jobanyń quny – 407 mln teńge. Qurylysy bıyl bastalǵan 13 turǵyn úıdi 2019 jyly tolyq paıdalanýǵa berý josparlanǵan. Elbasynyń halyqty baspanamen qamtý boıynsha bergen tapsyrmalary jergilikti jerlerde osylaısha nátıjeli oryndalýda. Jalpy, Ońtústik Qazaqstan oblysynda bıyl 780,2 myń sharshy metr turǵyn úı el ıgiligine berilmek. Jyl basynan bergi 4 aıdyń qorytyndysy boıynsha 296,3 myń sharshy metr turǵyn úı, ıaǵnı 2844 páter paıdalanýǵa tapsyrylǵan. Bul ótken jyldyń osy merzimimen salystyrǵanda 143,5 paıyzǵa ulǵaıǵandyǵyn kórsetedi. Al Saryaǵash aýdanynda ótken jyly 19,9 myń sharshy metr, al bıylǵy 1 mamyrdaǵy qorytyndy boıynsha 7,780 sharshy metr turǵyn úı el ıgiligine berilipti.
Kókónistiń erte pisetindigi de aýdannyń taǵy bir ereksheligi. Sondaı-aq qarqyndy baý jobasyn «Agro Fýd Qazaqstan» JShS ótken jyly júzege asyra bastaǵan bolatyn. Búginde 250 gektar aýmaqty qamtıtyn qarqyndy baýda 22 gektarǵa shıe, 13 gektarǵa órik, 70 gektarǵa shabdaly jáne 92 gektarǵa alma kóshetteri egilgen. Seriktestik baýdan aldaǵy ýaqytta 60 tonna alma ónimin alýdy josparlap otyr. Oblystaǵy ortasha kórsetkish 15 tonna ekenin eskersek, mundaı ónim Ońtústik óńirinde buryn-sońdy bolmaǵan. Sondaı-aq osyndaı ozyq tájirıbelerdi ózge aýdandarda da paıdalanyp, qarqyndy baýlar sanyn arttyrý kózdelýde.
Saryaǵash – О́zbekstanmen shekaralas jatqan aýdan. Demek týrızmdi damytý úshin shekara mańyn abattandyryp, kórkeıtý mańyzdy. Osy oraıda oblys ákimi turǵyndarmen kezdesýde memlekettiń qoldaýyna ıek artyp otyra bermeı, óz aýlalaryn taza ustap, týǵan jerdiń kórkeıýine árbir azamat úlesterin qosý qajettigin jetkizdi. Týrızmdi damytýda shıpajaılardyń alar orny erekshe, árıne. Bıylǵy I toqsanda Saryaǵash aýdanyna 34 100 adam kelgen, ıaǵnı ótken jyldyń tıisti kezeńimen salystyrǵanda 21,1 paıyzǵa artyp otyr.
Ǵalymjan ELShIBAI,
«Egemen Qazaqstan»