Bıyl stýdentter men jumysshy jastardyń sany 2150 adamǵa deıin ósti, dep habarlaıdy Atyraý oblystyq О́ńirlik kommýnıkasııalar qyzmeti.
"Jasyl eldiń" jumysy Atyraý oblysy jastar saıasaty máseleleri basqarmasy jáne Atyraý qalasynyń jastar resýrstyq ortalyǵynyń qoldaýymen ótkizilip jatyr. "Jasyl el" jumyspen qamtyp qana qoımaı, jastardyń belsendiligin kóterýdi maqsat etedi.
Aǵymdaǵy jyly «Jasyl El» jasaǵynyń sany artqan. Aldyńǵy jyldary 700 sarbaz bolsa, 2017 jyly 2000 sarbaz jumys istegen. Al, bıyl 2150 sarbazǵa deıin jetti. Jasyl elde qyzmet atqaratyn jastar salyqtar men áleýmettik aýdarymdardy qosa eseptegende 61 myń teńge jalaqy alatyn bolady.
"Qazir qaladaǵy kóp halyq júretin jerler men saıabaqtardy abattandyrý men kógaldandyrý jumystary júrgizilýde. «Jasyl El» jasaǵy kógaldandyrý men arheologııalyq baǵyt boıynsha jumystar atqarady. Arheologııalyq baǵytta jastar Saraıshyq pen Qarabaý eldi mekenderine baryp, zertteý jumystaryn júrgizetin bolady. Jospar boıynsha, qazan-qyrkúıek aılarynda qalaǵa tal egiledi", deıdi «Jas Otan» JQ tóraǵasy Abylaı Qurmetuly.
Aıta keteıik, «Jasyl El» 2005 jyly Elbasynyń bastamasymen bastalǵan bolatyn. Dástúr boıynsha, jasaq jumysy 1 maýsym kúni bastaldy. Resmı ashylýy eki aptadan keıin bolady. «Jasyl el» jasaǵyna 16 men 29 jas aralyǵyndaǵy stýdentter men jastardy qabyldaıdy. «Jasyl El» jasaǵyna qabyldaý Nursaıa yqsham aýdany, 23 úıde júrgizilip jatyr. Jaz boıy qabyldaý jumystary júrgiziledi.