Shanhaı Yntymaqtastyq Uıymy aıasynda Kytaıdyń kýrorttyq Sındao qalasynda alǵash ret uıymdastyrylyp otyrǵan kınofestıvalde Sh.Aımanov atyndaǵy «Qazaqfılm» kınostýdııasy men «Belarýsfılm» yntymaqtastyq týraly memorandýmǵa qol qoıdy.
Kınematografııa salasy men mádenı baılanystardy damytý maqsatyndaǵy qujatqa qol qoıý rásimine Sh.Aımanov atyndaǵy «Qazaqfılm» AQ vıse-prezıdenti Dáýren Ábdihamıtov pen «Belarýsfılm» ulttyq kınostýdııasynyń bas dırektory Vladımır Karachevskıı qatysty.
Ekijaqty birlesken Memorandým kınoóndiris tóńiregindegi kiltıpandy máselelerdi retteýge baǵyttalǵan. Sonymen qatar, qujatta kınoóndiristi uıymdastyrýǵa yqpaldastyq etý, kınotýyndylar almasý jáne dıstrıbýsııasyn jasaý, kınematografııa salasyndaǵy mamandardy taǵylymdamaǵa jiberip, tájirıbe bólisý máseleleri de qamtylǵan.
Yntymaqtastyq týraly kelisimdi sóz ete kele, «Qazaqfılmniń» vıse-prezıdenti Dáýren Ábdihamıtov, atalmysh memorandým eki eldiń kınematografııa salasyndaǵy baılanysy men dostyq qarym-qatynasy jolyndaǵy mańyzdy qadam ekenin basa aıtty.
Shanhaı yntymaqtastyq uıymyna múshe elderi kınofestıvaliniń konkýrstyq baǵdarlamasyna 23 kınolenta qatysyp otyr. Olardyń arasynda eki otandyq kartına – rejısser Rústem Ábdirashevtiń «Almas qylysh» tarıhı fılmi jáne rejısser Talǵat Temenovtyń «Bizdiń qalanyń hanzadasy» melodramasy. Jalpy kınofestıval kórermenderiniń nazaryna 60 kartına usynylmaq.
Sonymen qatar, festıvalde kórermender Sh.Aımanov atyndaǵy «Qazaqfılm» kınostýdııasy túsirgen basqa da kartınalardy tamashalaı alady. Olar: rejısser Aqan Sataevtyń «Anaǵa aparar jol» dramasy jáne rejısser Sábıt Qurmanbekovtyń «Oralman» kartınasy.
Úzdikterdi 12 kásibı mamannan turatyn qazylar alqasy anyqtaıdy. Qazylar alqasynyń tóraǵasy – tanymal qytaılyq prodıýser Han Sanpın. Aıta ketelik, qazaqstandyq rejısser, prodıýser Sergeı Ázimov negizgi konkýrstyń qazylary qatarynda.
Kınobáıgege qatysýshylar «Úzdik fılm», «Úzdik rejıssýra», «Úzdik ssenarıı», «Úzdik er adam róli», «Úzdik áıel adam róli» atalymdary boıynsha jáne qazylar alqasy taǵaıyndaǵan arnaıy júldemen marapattalady.
17 maýsymǵa deıin jalǵasatyn ShYU aıasyndaǵy kınofestıvaldi QHR memlekettik kınematografııa basqarmasy men Shandýn provınsııasynyń ákimshiligi uıymdastyryp otyr.
Aıgúl AHANBAIQYZY,
«Egemen Qazaqstan»
ALMATY